120212 婚展(2)

上月知道同事A今年九月結婚，所以就約左2月一齊去婚展。本身尋日同我妹妹行完一次，已經好攰唔想再行，但一早約好左無理由放飛機，所以攰住都再去會展。

經過尋日既經驗，我經過灣仔天橋都拎左個環保袋，睇下會唔會有新野拎。同事A同佢女朋友D，佢地今日目標係搵Photography同租褂。行左好幾間，佢地都好似唔岩心水咁，後未經過一間無客人既叫『In Love』，我地走去睇佢啲相，D好似有興趣喎！後未坐低聽下Package，$8500/2P1V跟全日送哂成長片段個啲例牌，佢見我地無反應加多句，送即場哂相。

嘩！好抵丫~點知決定落單時，個姐姐又話唔得喎！後未先知頭先個男人原來係MC，乜都唔識講錯哂，但又講左出黎唔想無左個客，唯有同我地講：相片有上限150張！大家心諗賺哂，所以決定落單！

第二個任務就係租褂，因為佢一早諗好租『鴻運』，所以就直接去個間！D決定租小五福，因為唔想咁多金銀線，話著到好肥咁話！佢落單時我睇下啲褂先知，原來褂都有好多唔同特點，有平腳、圓腳、波浪腳都有！勁~ 租完褂D話去探佢表弟，原來佢表弟Vmarry做Wedding Planner，我就好奇問點解唔搵表弟搞？佢笑笑口講：佢收得貴嘛！

去到個Counter，D同我講之前佢試過呢間其中一個化妝師，幾靚但淡左啲！我見到有另一個化妝師係度，八掛睇下佢啲相，見到有好多唔記得咩小明星，直到睇到一張相……林欣彤，佢妝前同妝後變化太大啦！所以決定join試妝~

後未D同表弟講岩岩搵左攝影師join埋，點知表弟好大反應話，你上次好鍾意個個Jason而家會展特價$9000，D聽完好唔開心。我就去左睇另外一個攝影師Steve既相，佢係側邊介紹自己作品，除左結婚擺酒相之外，連政府影大合照都搵佢，好似真係有啲料到喎。睇Steve啲相真係好開心，頭先睇咁多間都無呢種感覺。但佢真係比其他貴，一分錢一分貨會展特價左都要萬幾。

之後真係好攰，大家都決定走！今日總算有收穫，但個攝影師好似貴左啲，真係要認真考慮考慮！返到屋企又拎啲單張出黎研究啦~

120211 婚展(1)

第一次去婚展，跟我妹妹及未來妹夫同行。未講入會場，淨係排隊買飛都用左超過半個鐘了。真係打蛇餅個隻丫！我妹妹比我早三個月擺酒，加上個係擺酒前兩年開始籌備，有多次行婚展經驗，所以行灣仔天橋去會展時，提我沿路有人派環保袋要拎，開頭都唔明點解，當我入到會場就明白。

因為會有大量單張不停咁派比你，而我呢啲第一次去婚展，連酒樓都未決定既人，就見咩攞咩驚死拎少左咁。個場行左半個圈，就已經成袋單張好重丫！我好迷惘，只知道好多選擇花多眼亂。但對手都係不停咁拎單張，拎返屋企望下都好！而我妹妹同未來妹夫今日個目的，係搵律師搞証婚。佢行左幾間已經有目標，坐低之後就選擇個樣貌比較善良既律師後，就決定落單啦！ 

行左幾個鐘，大家都開始攰就決定走！我就帶個一大袋戰利品(單張)返屋企。返到屋企食飽飯就拎出黎，呢叠單張逐張睇。關生笑我拎咁多返黎，好唔環保丫！