141108豬B預產期(40w)

今日係豬B預產期 我驚左成晚 覺得個肚實哂咁 拿住哂硬到三角位勁痛 簡直形容唔到個種感覺 最後停左痛無入院 再係咁人都癲 成個肚硬哂 硬左好耐好耐 成個肚拿到實哂 但豬B係度勁郁 我痛到4點 嘈醒埋老公打算入院 仲煮埋公仔麵諗住食飽先入院 點知食完公仔麵 就無痛好神奇呀 唔通豬B同媽咪講 佢肚餓要食野？

真係估唔到 肚硬到腰骨都痛埋 我覺得個3角位痛到行步路都辛苦架 之後同媽咪講返 原來之前生我地前幾日都係咁喎 佢估我呢幾日就生 估計係練習 叫我有心理準備 豬B隨時出閘

141030屯院補品materna(38w5d)

最近隔個星期去政府同私家兩邊產檢 越近預產期就越檢查得密 雖然我知道政府產檢都無乜用 但都會聽話去檢查

今日我又去左屯院檢查 例牌驗尿+磅重+血壓 今次都唔例外順利過關 入到醫生房上床 終於聽到豬B既心跳 今次呢個女醫生似係實習緊 好細心好溫柔同我解釋仲有10就預產期 有咩需要注意 如果作動要點處理 睇得出佢勁有Heart 之後竟然同我講要開補品比我 

黎屯院檢查左咁多次 第一次有醫生話開補品比我 好奇心下我去左拎補品 估唔到我等左個幾鐘既補品 竟然係我每日都食緊既Materna囉

141007媽咪谷聚-MiraBuffet(35w3d)

尋日先應承唔出九龍 今日就自己一個偷偷咁出左尖沙咀 我覺得自己真係唔乖 其實係上次媽媽谷聚會 Charley出唔到黎 大家都成日講想食Buffet 今日就約左去食 雖然得我兩個媽咪 但都唔錯喎 唔洗諗下呢個鍾唔鍾意 個個又會唔會覺得唔好 

Charley係後生媽媽 比我細好幾年 我同佢一見如故 好似識左好耐咁 我好鍾意佢啲性格 同我有啲相似 有個樣講個樣 鍾意唔鍾意都直接講出口 唔會好似其他人咁心是心非 係你面前講一套 係你背後做一套 可能因為咁 我同佢一樣成日得罪人啦

141006媽媽谷聚-宵禁前最後一擊

關生話我大住個肚成日自己周圍去好危險 提出左要乖乖地多啲留係屋企養胎 咁同宵禁有咩分別喎 不過我都知佢為我地好 佢見我唔開心 就同我講 比我出多次九龍 我梗係好好把握呢次機會 一日連續玩兩場啦

係宵禁前第一擊 即興約媽媽會啲老友出黎Tea一Tea先 就約左K11 Kitchen M Caffe 其實食咩都無所謂 只係想臨生前同大家聚一聚 大家坐係度個個都頂住個肚 好搞笑

接住夜晚就同另外幾個媽媽去左禾牛薈打邊爐 之前成日聽佢地講 呢間啲牛好正 好想試好耐架啦 我地6個大肚婆又叫到成枱都係 我發現大肚都幾好 連我地去廁所都好緊張 好多人都特別照顧我地 食飽飽就散水啦 我既宵禁日子開始了

141004媽媽谷聚-德國餐廳Buffet(35w)

 

今日約左屯天元媽媽聚會 去食德國餐廳LunchBuffet 其實之前我地都去左幾次 我覺得呢度最好係可以由上午10點開始 食到下午4點 無人會趕你走 見我地大肚仲好細心 安排比較闊落既位置比我地添

距離生既時間越近 心情都開始緊張 今日講既話題係生完有咩要注意 12個大肚媽咪有講有笑 嘻嘻哈哈傾左4個幾鐘 我諗下次再聚會 應該會阿B出世後啦

140921媽咪谷聚-ThePlaceBuffet(33w1d)

好震撼 24個大肚婆一齊去TeaBuffet 個個都鑼咁大個肚 感覺侍應都對我地好啲 大家有傾有講真係笑足全程 好期待下次聚會

140914媽咪谷聚-元朗煌府(32w1d)

屯元天媽媽聚會 11個大肚婆一齊飲茶 一人叫一啲又叫到成枱野 最後又係食唔哂 食完仲一齊行街街睇BB野 識到一班媽媽 真係好開心

140905媽咪谷聚-影大肚相(30w6d)

早2個月前一班媽媽10個人就組團一齊去影大肚相 其實我對影大肚相無乜大興趣 志在同熟個幾個媽咪去玩 就好似一個聚會咁 見平平地所以就一齊上去聚下 間影樓都幾好 環境乾淨 地方夠大 都幾舒服 我地幾個加錢化妝 所以早啲上去影樓 我個人覺得化妝師化得普通 講唔上差但唔靚囉

係等齊人化妝就開始影『個人大肚相』先 我準備左一對有豬樣既襪仔 真係好可愛架 而影樓都有少少工具比我地用 每人影15分鐘 起初我都有D緊張 影影下都自然左

10個媽咪影齊『個人大肚相』之後，就開始影3張既Group相：

第一張：分3組坐係梳化度影，我完全唔明攝易師想我點，我不停笑，對腳都唔知點放好。

第二張：好搞笑，個人獨立影，每個人做唔同動作，影完之後攝影師將所有媽咪放埋一齊。

第三張：所有媽咪Group埋一齊影，大家係度傻笑。

可能因為大肚關係，體力真係虛耗得快好多，玩左一個下晝真係攰到郁唔到，不過好開心既，一班媽咪朋友一齊影相，傾下計咁嘻嘻哈哈又一日。

140902媽咪谷聚-雋太放題(30w3d)

自從上次Outback聚會 今次我地媽媽會又一行10人出發 10個大肚婆浩浩蕩蕩咁去食放題 不停叫刺身生野 嚇到隔離枱係咁望住我地 叫到成枱野食唔哂 大肚時識到一班朋友真係好開心

140829元朗容鳳書飲糖水2(29w6d)

第2次飲糖水 經過上次既經驗 加上有M媽媽咁啱都一齊去 所以我叫左關生今次唔洗陪我黎 照舊8點半到 到左又係等叫名 又係鬼咁多人 首先係抽血先 除左佢比你支大糖水 抽完血乜都唔食得 唔飲得咁等2個鐘 其實係要諗呢2個鐘有咩可以做

我一早download左套戲去睇 諗住睇完就抽血走人 點知同M媽媽係咁睇淘寶 佢諗住買BB車 仲要買架粉紅色比佢個仔仔 佢話要幫佢扮女仔 哈哈 另外我準備左把風扇仔 記得上次想嘔係因為好焗 所以風扇仔係必備

時間過得好快 係咁睇睇睇下淘寶 咁就過左1個鐘 飲糖水最難捱既時間黎啦 我上次又係夠1個鐘就有少少想暈想嘔 可能因為前1晚已經無食野 咁早起身仲要抽左血 所以有啲辛苦 之後就乖乖呢埋眼訓覺啦

明明唔眼訓就呢埋眼休息下 後生媽媽果然唔同啲 M媽媽反而無咩事 真係唔認老都唔得 等左2個鐘再抽血之後走人 如果4日收唔到電話就代表安全 希望唔好打黎啦

140823媽咪谷聚-ALittleBit(29w)

今日約左兩位媽媽試呢間 A Little Bit 之前成日見啲朋友去試 睇相勁豐富既 All Day Breadfast 去到我都唔執輸 揀左個最重量級 話哂2個人食 梗係食個勁架啦

個餐到左 係比我想像中大份 賣相靚仔 味道就一般啦 我仲好大膽叫左柸違禁品黑牛 越偷食就越開心 呢柸黑牛真係好正

140822元朗容鳳書產檢(28w6d)

自從上次檢查 豬B心跳快左要入院後 我真係怕左去健康院 今日我又返黎健康院 又係同一個姑娘幫我聽心跳 我緊張到屎

個姑娘睇到我排版 都話記得我 之後好小心咁幫我聽左3次心跳 因為上次心跳唔正常 所以今次都係要見醫生

入房見醫生時 佢又話要調返我返屯門醫院 我忍唔住同佢講 我已經比你地當人球咁周圍踢 點知醫生好肯定答我 之後你唔會再返黎呢度檢查 聽佢講到咁肯定 我都無野好講啦

140815媽媽谷聚-Outback(27w6d)

今日又係屯天元媽媽聚會 好搞笑 一次過有10個大肚婆一齊食野 Book左去Outback 大家都好興奮 大家有講有笑 嘻嘻哈哈 之後仲唔捨得走 轉地方食糖水 好開心 好期待下次聚會

140811媽咪谷聚-譚仔+買浴盤(27w2d)

早幾日同Emily媽媽去完華嫂食野 見識過芭蕉扇既威力 細細部但勁大風幾涼 就心郁郁想買 Emily媽媽勁好人 叫佢老公幫我地出深水埗買 今日約出黎交收 諗唔到食乜 就去左食譚仔 

可能成日聽人講大肚唔好食辣野 人地越唔比你食 你就越想食 我呢排日日都掛住個麻辣豬耳 今日終於食到啦 食完譚仔就急急腳走 因為約左妮媽媽出去買浴盆 呢個浴盆摺得架 其實佢係翻版野黎$120 如果吉豬島買正版差唔多要$500 因為我要買兩邊屋企 所以買平平就算啦

我同妮媽媽買完浴盆好攰 去左朗豪坊starbrucks飲柸野再走 而家行一陣就勁攰 之後竟然關生黎接我 好彩佢黎咋 因為多口幫Carmen媽媽買1個 我一個人拎3個浴盆都好吃力下 最後送去葵涌比Carmen媽媽就返屋企啦 今日真係好攰好充實 

140807媽媽谷聚-華嫂(26w5d)

今日即興話食Tea 食傳說中既華嫂 今日同Emily媽媽+Mika媽媽要去試下 係咪真係咁正 係咪有咁好味 究竟有幾特別 

去到未夠鐘開 未食已經排長龍 今日閒日都可以咁多人排隊食既 啲人唔洗返工返學架 好彩我地都排得前 有帆布遮頭有櫈坐 Emily媽媽拎左把勁風扇仔 叫芭蕉扇 細細部但勁大風幾涼 唔係大住個肚都幾辛苦

終於等到開門啦 我地好幸運入到去坐 雖然唔係冷氣位 都好過門口等 我地叫左4樣野食 比普通茶餐廳既味係濃啲 係比想像中好味 未食過既朋友值得試下 不過我覺得唔值得咁排隊囉 因為無冷氣關係 我地食完頂唔順走左 之後去左麥記買雪糕 繼續吹水 傾到成6點先走 哈哈 

140804與豬B+詩韻ee下午茶(26w2d)

同好朋友詩韻約左好幾次先約到出黎 我地識左好多年 雖然耐無見面 但每次見面就有唔完既話題 不停傾不停講 啲時間好似唔夠咁

上網睇左呢間西宮好耐 一直想試下佢個Tea 睇相好似好靚咁 今日終於試到 首先講賣相靚既 味道就一般啦 始終唔係樣樣都好味 佢最正係無限飲 我地口水多過茶 勁講野會勁口渴 飲左幾柸咩都賺哂 呢度傾計一流 可以再黎過 

140802媽媽谷聚-德國餐廳(26w)

今日同屯元天媽媽谷啲媽媽出黎 我地近近地去洪水橋間德國餐廳食buffet 雖然種類唔多 但樣樣都好味 佢最出名係豬手 我食左幾轉呀 

另一樣野好正既係 佢由11點食到4點 唔會趕人走 由我地坐係度吹水 啲侍應又好禮貌 埋單先知再有優惠 5個人去1個免費 真係好抵丫 我地顧住食野同吹水 完全唔記得左影大合照 好搞笑 好期待下次聚會 

140731Mides3折(25w5d)

今日Mides做3折開倉 約左媽媽谷既Jade媽媽一齊去 其實佢尋日已經掃左一轉今日再去 我地夜晚個轉去 一早到左係門口排隊 好彩有櫈坐下 唔係咁大個肚都好辛苦下 等左一陣就有得入 後未越夜越多人 雖然好迫好攰 但買到野比豬B係值得架 幾時都話「有媽的孩子像個寶」 

140730入屯門醫院2(25w3d)

因為驚左成晚好似無訓過咁 諗返都真係好嚇人 無端端係耳邊有人講野 搞到我起哂雞皮 我6點起左身刷牙 怕一陣多人起身時同人爭廁所 

刷完牙返黎就見到姑娘拎件手術袍 比對面近窗個張床既媽媽 原來佢胎水過多 醫生話有危險要即刻做手術 聽講BB只有32w 聽到要即刻開刀 個人突然好緊張 我又摸住肚自言自語同豬B講: 媽mi唔趕時間 想你住足40周先出世 之後有姐姐派餐 個粥我食左一啖 真係清淡 好勁完全無味 另外個菜肉包仲勁 個皮硬架

之後我又係食關生買比我既奶同餅 再一次諗 早知買柸麵啦 不過有餅食已經好好架啦 起碼唔洗餓啦

記得入院時 姑娘叫我見左醫生先食飯 估唔到入院咁耐 而家先見到醫生囉 接住有個再高級啲既女醫生幫我照超聲波 照完醫生話豬B好健康 我安心哂

見完醫生後 姑娘比左個樽仔我 話檢查埋個蛋白尿 無問題就走得 等等等 等左好耐結果安全 我急不及待走人 姑娘仲講笑 問我食唔食埋晏先走 我梗係唔食啦 哈哈

140729入屯門醫院1(25w2d)

比健康院被迫寫紙入院檢查 去到屯院上A7病房 姑娘要我落返地下急症室登記入院

拎好排版上返A7病房 啲姑娘都好有禮貌 幫我度高 磅重 量血管 再聽豬B心跳 今次豬B回復正常130 不過姑娘話要住院觀察一晚先

入院就安排手帶啦 戴住手帶突然覺得自己變左病人 明明個人無事 但坐係病床感覺好攰咁

因為入院過左食飯時間 我無飯食好肚餓 姑娘話要見左醫生先可以出去 好彩個時係探病時間 關生黎左陪我 唔係一定悶屎我啦

屋企人聽到我入院都好緊張 尤其係關生 一收工就飛過屯院睇我 係咁問我有無事 我見到對面床自己買外賣食 我答關生我好肚餓呀

等左成個鐘 探病時間都就過 但都未見醫生黎 再問姑娘一次 之後佢都叫我去食飯先 其實明知醫院唔會有咩好餸 個刻實在太肚餓 有咩放得落口都想食

食飽飯關生仲買左奶同餅比我 佢話驚我半夜餓親 半夜肚餓係醫院幫唔到我 我問佢點解唔買柸麵 佢笑住講 唔好食啲咁香既野啦

上到7樓 我叫關生返屋企先 我自己入房 上到床無野做 睇下電視 聽下隔離床傾計 話咁快醫院趕人訓覺要熄燈

好彩我訓細房最出 因為我驚黑 所以無拉埋個簾訓 對出就見到啲姑娘

成晚都訓唔著 突然聞到好香既柸麵味 原來我對面個媽媽食緊 救命 聞到我都肚餓 好彩關生買左奶同餅比我咋 早知買柸麵啦

食飽就訓覺 但估唔到訓到2點 我聽到有把聲係我耳邊講野 嚇一嚇 好彩咁啱有姑娘入黎幫個媽咪打針 我就坐左係度 驚左成晚 好似無訓過咁 勁辛苦 

140729元朗容鳳書產檢(25w2d)

繼上次做人球比健康院踢去屯院檢查 之後又踢我返健康院 今日返健康院檢查 雖然話檢查 但其實只係聽心跳  

今日如常咁度高磅重量血壓 例牌動作做齊 之後等叫名聽BB心跳 唔知係咪豬B今日太興奮 聽左3次都過150 姑娘話要見醫生 點知見醫生時心跳到160 寫紙要我即刻入院添 搞咩呀 

140712惠氏講座(23w)

今日約左媽媽谷Carmen媽媽去聽惠氏講座 我第一次見佢都係去聽講座 

今次個講座係惠氏媽媽會搞 產前產後湊B實習班 其實惠氏搞講座真係搞得好密

係門口排隊點名登記後 安排左7號枱比我地

入場時 仲每位媽媽派左份小禮物-Mustela套裝 聽講呢個牌子沖涼好香架

而每張枱上都準備好哂 一陣講座既用品

仲有每人有假BB一個 我每次見到呢啲假BB都覺得好好笑 完全幻想唔到 抱住自己BB會幾咁騰雞

我練習沖涼同換片時 仲整甩左BB隻手 笑屎我

最後聽完講座時 即場填表入Huggies會 又有禮物 至於呢啲講座學唔學到野就見仁見智 不過真係好多禮物拎就真既 哈哈

140707佐敦Dr.Fung照結構(22w2d)

因為今日照結構 早幾晚完全訓唔著 成日聽人講照結構係BB第2個關口 而我入既媽咪谷都有2個媽咪照完結構 就同BB講拜拜 所以我真係好緊張好擔心 原本約左6月尾照既 但馮醫生話豬B細左一星期 建議遲多個星期先照 驚睇得唔清楚 咁我就約遲左10日先照啦

因為關生唔得閒 今日都係由鐵膽 豬B婆婆陪我出佐敦照 豬B婆婆真好 每次都陪住我周圍去 約左11點 好快等左半個鐘就到我睇

馮醫生好詳細睇每個部位 手腳骨既長度 心臟有無分左右上下 臍帶 連手指腳指都續隻數 全個過程照左15-20分鐘左右 馮醫生話豬B好健康 佢仲間中轉4D比我睇豬B個樣我睇 

前前後後睇左佢幾次都用手遮面 後未先影到一張 雖然唔太清楚 但都睇到輪廓 我同豬B婆婆睇住醫生個mon 就覺得勁似關生 尤其係個面形 不過無論似邊個都好 最緊要豬B健健康康就足夠 我仲要埋隻碟拎返屋企比關生睇 等佢都開心下 

140628公公朋友送衫仔(21w)

公公今日收到拎左兩大包衫返屋企 原來有個朋友係大陸開廠做BB衫 佢每個款都執左兩件比我地 其實係一袋比阿妹 一袋比我 好開心 豬B多左一大堆衫黎著 又可以慳唔少 我地豬B真係好幸福呀 

140627uBaby坐月講座(20w6d)

估唔到尋日臨急臨忙上網 睇到uBaby搞陪月講座 即報名即有人覆有位 我同我9月預產期既好朋友R一齊都去聽下 我地約左佐敦等

上到去先知佢地係間樓上舖 好多野都有得賣 床仔 尿片 紗布…… 淋淋沈沈都有幾齊下個隻 未夠鐘聽講座 我同朋友R周圍參觀下

行左一陣講座開始 齊齊入去聽 有個好有經驗既陪月姐姐介紹 有咩會由佢地可以幫手做 其實佢地講既內容都好表面 或者佢地主要目的係sell陪月服務啦 聽完講座賣張問卷 有禮物拎

禮物有兩包無用既野 一包有5小包唔飲既挼乳茶茶包 另一包係BB洗衣粉 之前聽啲媽咪級朋友講 唔好用洗衣粉洗阿B衫 要用洗衣液比較好 

之後我就同朋友R去左食晚飯 一向聽開佢老公好嚴謹 自從有左阿B後唔比佢亂食野 竟然今晚作反 同我食八方雲集 仲要食酸辣湯好鬼大膽

而一早無戒口既我 當然陪佢食啦 我地仲叫左麵線 餃子同窩貼

大家有傾有講 嘻嘻哈哈咁食野 直到佢老公打黎吹佢走 我地先捨得走