121229 最後倒數90日

最後倒數90日，真係要把握時間啦。各位加油丫~

121225 邀請朋友

距離Big day日子越近，心情都開始緊張起黎。雖然呢排好努力，但好似好多野都未搞掂，真係有啲擔心。

之前都聽人講過，結婚就睇到邊啲係真朋友，我呢個月真係深深感受到。我想講唔係請朋友黎婚宴，佢出席咁簡單，而係我無諗過有啲朋友真係好多年無見，耐到我都唔好意思炸佢地。點知有一班唔好意思請佢地既朋友，主動聯絡我話要黎飲，超出哂我預算啦！同埋呢個時候要換姊妹，我都好輕易搵到人頂替，真係好感動~

不過有啲人和事，我地未必控制到，就好似我明知自己擺酒個日係復活節，我有啲朋友係有小朋友既，我預左佢地要出外旅遊，又或者有種種黎唔到既特別原因。只要簡單同我講句唔黎，我從來都無迫人出席。

今日我同大家分享2個有趣故事：

(1) 其中有個朋友講出奇怪原因: 我真係唔介意佢唔黎，但點都好都唔應該拎屋企人黎亂講！舊年有朋友結婚佢唔去，當時佢話某長輩走了，因為我記得當時佢喊得好淒涼，令我想起自己的婆婆走時，我心情都一樣好唔開心, 所以我印象好深刻。而今次佢又講呢個長輩走左，真係好可怕。

(2) 另外有一位尊敬既某校老師，我請他來飲。老實講心預左佢唔比人情，唔係講笑架。因為之前仲讀緊夜校時，一班同學放學經常約他去宵夜，他次次都係食飽就走先，從來無放低過一分一毫。同學們都預左夾錢請佢的，所以今次請他黎我婚宴，我都預左請他的。但無諗過，佢竟然講到出口，叫我不要派帖但餅咭可照比他，仲講明不會比人情。講真！自己預左唔收一件事，但從他口中講出就係另外一件事，感覺他好老土。

分享呢兩個有趣故事，等大家係邀朋友時有心理準備，乜回應都有機會聽到，真係千奇百趣。同埋好好珍惜自己真正既朋友！

121222 姊妹裙(1)

終於搞掂姊妹裙啦！心情真係好，因為呢樣野比某個姊妹拖左3個月都未去！不過，過左去就不要再提，總之而家解決左就好啦！因為我的姊妹全部是住元朗的， 所以我去左元朗睇裙！

妹妹介紹我元朗有間做姊妹裙經濟實惠，我就同朋友去睇下，款式唔算多。但基本款式都有，我拎左幾條出黎就揀到了！揀顏色就比較煩惱，因為我新的酒樓，背景會轉色的，有幾隻色唔揀得了。老闆娘提議做香檳金簡單易襯，就算我揀咩色晚裝都唔會撞，問完朋友們意見就拍板了。 

老闆娘話我點解咁遲做裙，尤其我要訂做真係好趕。佢仲好細心，拎張紙叫我寫低所有姊妹既名同電話。佢會幫我通知姊妹黎度身，叫我煩少樣，真係好細心丫！3個姊妹度好身就開單比錢了，另外個3個姊妹我都通知左佢地，度好身就做得，而老闆娘會幫我提佢地。

121219 最後倒數100日

時間過得真快，話咁快就倒數100日。呢次個Check List完成多左野，仲有3個月時間，真係要努力啦！

121218 揀帖

終於到了印帖的時候，酒樓講左送帖既，所以我地去左金都揀帖啦！因為事前一早同關生傾好，係呢個項目係唔可以加錢。因為我地覺得帖只係派出去，無論見到張帖有幾靚都好，我地一毫子都唔會加的。我既要求好簡單，就係最好張帖唔係白色，但如果唔係白色就要加錢的話，白色我都會照用囉！另外我地大家唔想加相，又唔會整特別野，所以應該好易揀得岩。

懶惰既關生聽到我同佢一樣咁無所謂後，佢仲要求想唔去揀，叫我自己去睇岩就決定。我不嬲都無所謂既，我就約左朋友去睇，上到去發現都唔少款揀，好快我就揀到有鍾意既款。後未我就多口問個老闆娘有無粉紅色啦，佢話如果要粉紅色每張加$7個半，我一聽到要加2千幾蚊，就決定唔要粉紅色。咁我打比媽咪問下，媽咪話咩色都無所謂，款最緊要我鍾意就得。

之後記低我地資料就搞掂，老闆娘話再約我黎睇排板，臨走前老闆娘比左卡片我，叫我介紹客黎印帖時，我一望張卡片老闆娘個中文名同我一樣，老闆娘知道都好驚訝！哈哈 ^_^

121214 又要再搵酒樓

明明好多Post未出，但都要打尖出左呢個先！天呀！點解我可以咁黑仔架？相信好多人去到呢個差唔多倒數100日時間，只會諗場地點佈置丫？請咩親朋戚友黎飲丫？印帖加咩相丫？整唔整Candy Corner丫？ 諗定化妝師set咩頭丫？但點解我咁不幸既呢?

今日突然收到個酒樓打黎電話，開頭以為佢打黎吹我落訂，點知係話佢間酒樓續唔到約，要安排去第二間擺酒！咁遲先通知點搵第二間呀？

121129 3V揀相

係大陸影相有樣野好，19號影完相，今日29號就可以揀相。本來唔想揀今日，因為今日係星期四閒日要返工，加上係我牛一，但我有個抵得諗同事S小姐，請假黎陪我返大陸揀相。

另外係大陸影相比香港好，就係比返d相你特別多，雖然都唔係全部softcopy比返哂你，但都有160張，可能我係香港已經影左輯，我覺得3V呢輯唔算靚囉！

但心諗以呢個價錢有咁多相，仲想點呀？你地覺得呢…

121119 3V影相日下集

上回講到要係古風尚呢間九唔搭八既舖頭食KFC，但佢地唔知呢埋邊度食，食得好快唔夠半個鐘又出黎搵我地，叫我地準備行，我抹好個咀阿Key幫我搽唇彩就出發，但個妝已經化左兩個鐘，無人幫我補過妝囉！我覺得真係搵笨~

講左咁耐終於開始影相啦！首先係湖畔影，個景真係好靚，仲好多蚊添呀！見到隔離有一對人又係黎影結婚相，個女仔成個背隻比蚊咬到一笪笪，睇到我都覺得身痕丫！好彩我一早準備左蚊怕水，我噴到全身都係勁大陣味都唔緊要，最緊要唔會比蚊咬！影左一陣我地行左去簡陋既濕地花園個邊，阿Key真係好好，驚我著高踭鞋辛苦，為我準備左對拖鞋，佢仲拖住我周圍去幫我地拎野。呢度影下個度影下，其實keep住笑都真係好攰架。 

之後我地去左花田影相，我就係為左呢個景join 3V 架！雖然比我想像中細，得個小山丘做景，但真係好靚好靚，攝影師知我鍾意呢個景，都刻意影多啲。但真係搵笨囉，之前3V又話自己拎左專利，得佢一間可以入去華僑城影婚紗相，但當日去到邊都有好多人影緊，係好多人個隻喎！

可能因為天氣太熱太哂啦，關生對住鏡頭笑都唔笑下，個攝影師都不停引我地笑，但實在太殘眼連我笑笑下都唔想笑。由河邊>濕地公園>花田，我發現每個景影相既範圍唔大，只係一個地方影好多張相，係時侯換妝同換衫。

我地又返去頭先食KFC既古風尚，我真係估唔到原來係呢度換衫，住間舖得一格更衣室，我換好藍色晚裝後，終於見返個化妝師啦！大家記得上集講過，我帶左本化妝書去攝影嗎？我上車時借左比佢睇！到set頭時，我同佢講今次一定唔可以將d頭髮扎哂上去，因為我實在太肥，同埋我想影出黎個髮型有啲變化。但我同佢講完，佢又係完全無理我，有無搞錯呀！佢見我黑哂面就我講，下一套先比我揀點set個頭。心諗你都整好啦，我奈得你咩何，同埋相只係影左一半，我唔想呢個時候搞大件事。

轉左藍色晚裝，我地就上左一個大草地上面影黃昏。攝影師不停咁叫我地打圈跑跑跑、跳跳跳、再訓地下，成個傻仔咁。影完大草地就去瑞士小鎮，個度啲屋仔真係好靚好適合影相，顏色好鮮明，佢地好求其影兩個位，又話換衫啦！咁快？之後激氣既事來臨啦！

我地又再次返去頭先個間古風尚，之前講過間舖只得一格更衣室去到有人用緊，化妝品師叫我係10幾個男人面前就咁換裙，我當時比佢嚇一嚇呆左！唔係嘛？洗唔洗咁開放呀？但估唔到有人真係係我隔離，就咁除左條裙係咁換，但我見到佢唔係香港人囉！當然我死都唔肯啦！我堅持要等入更衣室先肯換，而化妝師就用唔知咩語言鬧我，之後黑我面囉！

到Key幫我換好粉紅色晚裝出黎，點知化妝師把口仲未停，一路講一路set個頭。其實佢要點講我完全唔會理，因為我根本聽唔明。後未我開口同佢講，我想將啲頭髮紥埋一邊就可以，唔想個個髮型都差唔多。點知…佢又好似頭先咁，扮聽唔到我講野唔理我。之後我由得佢set，set完我同佢講「我唔鍾意 唔該你幫我set過」，佢同我講唔會再幫我set，我忍唔住黑面了。我就無再同佢講野，自己郁手拆左個頭啲野，嬲爆咁講「你唔幫我set 我自己set得架啦」，之後我就啲頭髮自己紥埋左一邊。佢見我咁嬲，佢不停講公司唔比咁，所有髮型係由佢地揀，之後一路set一路唔知咩語言話我，我忍無可忍話左佢一句「你set就set 唔set我就自己set 唔該你靜啲丫」之後就繼續黑面。

Set完頭我地就行上去茶溪棧橋，上到去睇住個天黑，可能已經無太陽，天氣開始凍啦！攝影師其其求影幾張又話落去，之後又去返一開始既湖畔影多幾張，之後就話返去個間古風尚啦！去到見到啲勁老土野，今早我借比化妝師睇個本化妝書，竟然係另一個客手上，而我要求化妝師但佢唔肯幫我set既頭，佢幫緊另外個客整緊。OH MY GOD…我真係火都黎埋！set完頭個佢地仲有地方未影就出左去，而同樣影東部華僑城既我地，要坐係呢間古風尚等佢地影完先走得。

又餓又凍又無野做，仲要坐係間舖頭呆等，關生寧願行左出面吹風，佢話勁眼訓喎！我就拎部相機出黎無聊影，呢度影下個度影下，等左個幾鐘個對客人先返黎，終於走得，但已經九點幾啦！上車回程返去都要成個鐘，返到去仲要再影埋室內。我今次同佢正接講唔要紥起，全部放哂落黎，超簡單就可以。化妝師今次乖乖地跟我指示整，今次我係最滿意的。係我轉妝既時間，我見到我等左勁耐既客人走得，原來佢係一早影左室內先出發，所以我地今早呆等左半個鐘，而係東部華僑城因為佢地，我地又呆等左一個半鐘，全日加埋浪費左我兩個鐘，而家仲影完走先？有無搞錯咩天理呀？

 

之後我地就入室內景影，講真玩左一日我地都勁攰，更何況已經10點半呢？我地見到攝影師都攰，我地影左15分鐘就話唔影啦，真係攰到唔識笑！之後佢地比左張問卷我填，寫返對佢地工作人員既服務質數，我當然會如實咁寫啦！我地就換衫執行李離開，好彩3V同地鐵站好近，返到家真係好攰好攰好攰，卸左妝即訓啦！

121119 3V影相日上集

呢幾日都好擔心個天氣，日日都落雨，前幾日擔心到打去3V講想改期，無諗過佢竟然肯比我hold多日影相期！可能之前係香港影左一輯相，已經知道想係自己結婚相度，加插自己鍾意既野，所以我前一晚準備一個小旅行喼，帶哂返去啦！我仲睇左幾日天文台話今日好天，點知真係無落雨但大霧！終於今日可以影相，但就唔係咁開心囉！

之前佢地約我8點半到達，我地非常準時，無諗過已經有人換好衫化緊妝了。我地等佢地同我對單，搞…搞…搞…搞左半個鐘，成9點先收好錢，之後就有個今日既助手阿Key帶我入去換婚紗。換完出黎無化妝師得閒，我就入去陪關生揀衫先！揀左差唔多一個鐘，10點都未有人同我講可以化妝，我就自己行出聲望下，點知連啲男仔都化好都無人叫我化，我就出聲問佢地都無人理我，之後服務員Apple先幫我搵化妝師。

埋位幫我既化妝師叫靜靜，我同佢講我想點整個頭，佢完全無理我一定要扎哂上去，一條頭髮都唔可以放落黎，我見整左都OK普普通通就算啦。之後同佢講我帶左本化妝書，想佢跟住大約咁整就OK，佢問我拎本書搭車時睇，我話好就放低左比佢！

我覺得佢幫我化妝化得好求其，之前個對8點半化到10點，化足個半鐘，我同關生兩個加埋先搞左半個鐘，化好之後就叫我地係車呆坐半個鐘，開頭無人講等乜，到11點有另外一對上車先知係等佢地，佢地上車就開車了！

呢個車程真係好漫長，首先要車左個對去左沙灘先，到沙灘後個化妝師同我講一陣先去華僑城搵我，竟然跟呢對人落左車，又話會有化妝師跟既？呃人架？

之後架車繼續向華僑城出發，點知條路比軍人封左要兜第二條路，唯有掉頭行…行…行…11點開車，竟然12點3先落車！落左車之後個攝影師竟然話食左飯先？佢仲帶左我地去左間叫古風尚既舖頭，叫我地係度食野…

睇緊我Blog既朋友有無覺得好搞笑，睇左咁耐我由8點半開始打到而家12點3都仲未開始影相，有無搞錯丫？最後關生唔想多事，就應佢地話食左飯先啦！個度無乜野揀，佢地叫我地買KFC方便啲，關生諗住預埋佢地，所以買左一大桶KFC，點知佢地唔食囉！因為食野位置連枱都無，我同關生都覺得自己好慘咁！

121108 Hitach導入器

由舊年開始，已經開始留意導入機，但聽朋友講要好勤力晚晚用先有效，所以一直拖到而家先買。尤其我開始寫Blog後，見到好多Blog友分享第一代既CM-N1000，真係心郁郁想買部試下。咁岩9月份見到團購有，今次諗都唔諗就買了！但比左錢先發現要兩個月先有得拎。等…等…終於有得拎啦！遲啲再同大家報告一下用後感啦!

121029 3V改完又改

 

我同關生一早起身去出發，連早餐都唔食就闖關，到羅湖轉地鐵，點知上到去比人激死左啦！

一入到去有個男職員成個蕃薯咁問我黎做咩，我當佢唔識用廣東話表達，佢之後同第二個職員講唔知我地黎做乜！第二個職員一行過就問我地係咪黎改期?我地答佢影相！之後問我想改幾時?我答佢我黎影相丫!佢再問我改幾時?天呀!真係雞同鴨講丫!

其實天暗暗又落毛毛雨，我都預左影唔到相！但都唔洗跳左咁多步，講都唔講就要我改期架!仲要一改最快都要改到下個19號丫！真係好慘丫！關生仲問我再落雨點算？我都唔識答佢！浪費左我一日假期！我地就帶拖住熊仔喼離開3V去搭地鐵，關生一路行一路仲埋怨熊仔喼出師不利，第一次行動就失敗！影相先黎落雨，真係連個天都唔鍾意我！

121028 3V揀裙

今日約左朝早11點去3V揀裙，我同個朋友Y約係上水食個早餐先出發！去到3V大約11點3左右，等左一陣就可以入去揀裙了！佢地安排左「彩虹」同我試裙，我個Package有四套，「彩虹」建議我揀一套拖尾婚紗，一套平腳婚紗兩套晚裝。

開頭「彩虹」只係比相簿我地揀裙，後未我同朋友Y直程行過去逐件睇。雖然佢地真係好多款，淨係拖尾款既婚紗都有成個架，但真係無件自己鍾意囉！經我試左十件左右，試完都無件特別鍾意，咁就揀件比較新啲，朋友Y話著上去感覺比較修身既一件。

之後就試平腳婚紗，反而平腳易揀好多，試左好幾件都可以，雖然件件都又賤又舊，但有我鍾意既婚紗款，最後揀左件簡單款。揀晚裝真係易好多，只要著上身顏色岩自己就OK，要求都無咁高。我就希望揀淺色啲，影相出黎效果好啲！雖然全程有兩個人幫我換衫，但係咁著係咁除都真係好攰架！最後試完都揀到四件，講唔上好鍾意但OK啦，只係影相組！

為左聽日影相，我專登去左整甲，經過上次經驗，今次整啲勁簡單款算啦！其實明知都唔會多影到手，但自己就諗如果影到無整到甲驚後悔！

係呢度天文台話聽日會落雨，仲影唔影到相呢？我要藍天白雲。希望聽日好天。希望聽日好天。希望聽日好天啦~

120929 DIY簽名筆

上網睇到好多Blog友自己整簽名筆，睇到心郁郁自己想試整，想整幾支獨一無二既簽名筆。今日終於捨得去深水埗買材料，真係花多眼亂好難選擇。因為一心諗住買左材料，試下整唔整到先再決定整咩花，所以求其買左啲玫瑰花仔，同毛毛波試整。

除左要買絲花同毛毛波，我仲買左啲工具：熱溶膠鎗，熱溶膠，銀色珠，發泡膠，油筆。返到屋企急不及待要試整，可能我少做手作野，有啲手忙腳亂丫。



首先試下整個玫瑰花先，睇Blog友分享痴花時，要唧多啲膠先會容易痴實。我就唧左好大堆膠落去，點知可能太大堆，個發泡膠溶左，好彩我買左好多個試整咋！吸取左之前既經驗，第二個花花成功啦！之後就挑戰毛毛波，佢比玫瑰花簡單好多，好輕鬆就痴好啦！



好似Blog友話齋，真係超有滿足感，唔怪得會上癮啦！但整左兩款出黎，就覺得花花比較靚啲，但毛毛波又比較特別啲，整邊個款好呀？你地覺得呢？

120927 uWeddings揀相篇

上月12號影相，好唔容易先等到今日27號先揀相，足足等左一個半月。我一直以為自己約左八點鐘，點知去到佢話唔會約八點揀相，因為實唔夠時間。但我七點九到左，等左半個先比我地入去，佢又前言不對後語話，因為約左八點個對人黎先，所以要比佢揀先，真係唔知佢邊句先真。

可能佢見我兩個女仔黎，係咁問我：「男朋友呢？佢做咩唔黎呀？要唔要等埋佢？再約第日……等埋一齊揀？」我話：「唔洗啦，我話哂事架！」

終於可以入去睇相啦！個姐姐好仔細咁教我點用，仲驚死我唔記得咁重覆左三次，睇岩點樣禁星星記低。佢仲好搞笑咁講：「呢度有閉路電視影住你地，連拎部電話出黎都睇到，千祈唔好偷影丫！」我周圍望笑笑口講：「係邊？係邊呀？你地唔貼張紙出黎話比人知，小心係犯法呀！」

  

因為我睇過其他Blog友分享，所以將所有相睇一次先開始揀。124張相睇完一次後……係揀唔落手！我記得影相當日同攝影師Joe講，我想影多啲望鏡頭相，同埋影多啲個紅色波波境。點知波波境既相得5張，同埋我數所有望鏡頭既相，都係得10零張咁大把囉！仲要有啲自己唔鍾意唔會揀，加上因為我實在太肥太肉酸啦！第一轉只係揀到8張，個刻真係心情低落！

後未個姐姐見我揀唔到，行過黎問我：「揀成點丫？係咪唔識用揀唔到相？唔洗驚肥我地會執，執完啲相會好瘦好靚，我求其搵張叫師傅執比你睇下啦！你繼續揀啦揀啦~」其實開頭有諗過，如果靚我會買多10零張Softcopy，連價錢都問埋會執$268一張，唔執$148一張，仲諗定個朋友幫我執相，慳返啲！不過睇下執左會點都好！講真執左都見得下人既~

之後個姐姐Sell我：

(1) 相簿：
整大本相簿，話加磨砂面可以防指紋，仲送個排板比我。我考慮左一陣覺得加磨砂要$2000，認真要考慮。同埋得個18張相仲諗排板話哂呢樣真係可有可無，唔係我重點需要。

(2) 相框：
正如Blog友所講，就係相框要加錢！老實講加錢同唔加錢，我覺得啲相框都係唔靚！不過佢見我揀張油畫係波波境，就sell我配啡色框，真係一個極普通既啡色框。我企係度諗左好耐，加錢同唔加錢都係唔靚，只係為左唔想咁肉酸而加$850？加黎做乜呢？

(3) 油畫：
佢sell我張油畫加防指紋，呢個佢唔sell我都一定加！因為前一星期去飲同事A個餐時，見到個個賓客臨埋去簽名前，都用手摸下張油畫。如果唔加真係想象唔到，之後張油畫仲要唔要得。個姐姐話除左防指紋，個面仲可以用洗潔精抹既。所以呢$1000我預左跌。

  

之後個個好識吹水個經理行過黎，同我一齊揀相，呢張又話靚個張又話好，佢仲講左句好好笑既說話讚我呢個肥妹：「你肥得黎好靚，影相未執都有腰！」真係多謝哂！佢見我咩都唔加，就好豪氣講：「頭先個三樣野，再加送大相簿海綿面，記得唔好上網講比人知」講真，我梗係上黎分享比大家知啦！等大家可以防避下嘛！

呢刻我見差唔多10點，同埋都係我預算之內，就成交啦！就咁……我又放低左幾千蚊係uWeddings啦！呢次就等得耐，要11月尾先可以睇相~

120922 Dorothy & Alex Wedding

阿力屎同佢太太阿多結婚，佢地係黃埔博藝會擺酒。因為我放假，就約左其他同事係紅磡，等埋一齊搭的士去啦！博藝會我第二次去飲，環境唔錯好似酒店咁！ 

因為我地遲左上去，上到去新娘入左去換衫，所以同事們都同佢門口迎賓既油畫，排住對咁勁影喪影，同幅油畫影相都咁開心，我地班同事真係好低B呢？！

 婚禮正式開始，首先由花仔花女進場，呢個花女未見過真人時，已睇過佢好多相，古靈精怪表情多多，當晚打扮得靚靚咁行入黎，都好似有啲緊張。 

之後到今日既主角出場，一對新人行入會場，加上音樂，現場氣氛好好。阿多表現得啖定大方，笑容滿面。

當晚最有型既新郎哥，當然要同佢影張相留念啦！

之前去過無數咁多次飲宴，我都唔會認真去睇現場環境，人地著咩裙，做左啲咩特別野，簡簡單單食完飲完就走人。可能自己就擺酒，今日特別去欣賞佢地，所做既每一樣細節。

120912 最後倒數200日

最後倒數200天，真係咩都未搞好傍惶丫！應該處理邊樣先好呢？

120910 新相機(Samsung)

呢排密密update個Blog，用個電話影相記錄，總覺得啲相唔夠好。襯住呢個機會，我比個藉口買部新相機比自己，順便學下影相！

話說兩星期前，我同一班喜愛攝影既同事講，想學影相買咩相機好？！當時大家興致勃勃咁叫我買大機Canon有咩好，Nikon有咩好，仲食飯時間專登揸車去荷李活廣場，個間Cam2睇相機。因為呢間舖放哂出黎比你任玩，唔似百記豐記咁，叫個部拎個部，拎多兩部機會黑面！

點知一拎到大機上手，我即刻知道唔岩自己，實在太重啦！我要買既係輕鬆方便，隨身攜帶去到邊影到邊就最好，影出黎既相質素高啲靚啲，但絕對唔要大傻瓜機。最後我就向Prosumer進發，Cannon‧Nikon‧Panasonic‧Pentax‧Ricoh‧Sony‧Samsung‧Casio‧Olympus‧‧‧

上網睇睇睇，出街試試試，最後我選擇左Samsung，黎緊我會用佢補返之前好多未寫既Blog，同大家分享架啦！

120906 結婚公仔(1)

決定擺酒咁耐，最難完成的一個項目，可算是買結婚公仔啦！

睇左好多次金都，好多款都唔係我心水。雖然我鍾意鬆馳熊，成個場都有鬆馳熊賣，但就因為我太鍾意佢，所以唔想買隻假野返屋企擺！係金都睇到都係以下呢d款：

 經我上網搵，有間賣日本正版鬆馳熊，會幫啲鬆馳熊做埋禮服同婚紗，店主真有諗頭。有呢三個款選擇：

(1) 呢款我最鍾意，因為個款簡簡單單，白熊個頭紗箍係耳仔度可以拆出黎，個設計真係有心思丫！

(2) 呢個款就多啲detail 位啦！好似白熊頭紗加多珠仔，同埋件婚紗變左蛋糕裙，好有層次丫！

(3) 我個人對中式款就覺得麻麻地，感覺好累贅咁囉！

 不竟係日本正版鬆弛熊，單買公仔都$500，做埋禮服同婚紗要$1300，好似貴左啲。我朋友仲笑我，邊有人睇得出真定假丫。所以要認真考慮下先決定，又再睇下先啦~

120905 uWeddings約揀相

真係不知所謂！上個月12號係uWedding影相之後，一直無人打人通知我揀相！今日忍無可忍自己打落Shop約睇相，打去搞到我仲嬲！佢竟然話「有同事一早打過比我，只係我無聽佢電話！」我仲可以講咩丫！為左唔想再找麻煩，只好硬食啦！

之後個姐姐真搞笑，係咁叫我「閒日晏晝去揀相，仲提我一定要叫埋先生去！」我知啦！閒日唔會阻住你其他客嘛！叫埋我先生黎比你sell嘛！

最後我揀左閒日夜晚，因為我真係無哂大假啦！同埋我想我啲朋友陪我去。迫住要拖到月尾27號先睇相。真係好擔心趕唔切丫！

120825 好朋友相聚

係英國定居既好朋友B先生，返左黎香港探親，我作為B先生既好朋友，當然會見面食飯啦！因為上餐由另一位人兄埋左單，所以我再約B先生請佢食飯，幫佢洗洗塵。因為佢地話未黎過我屋企，所以今次決定黎我屋企……打邊爐。

我啲朋友都知，黎我屋企地方細細又無野玩，每次上黎活動都只係打邊爐，但點解佢地都仲咁鍾意上黎呢？因為我會一早準備好哂所有食既野，佢地一上到黎就可開餐，過門都係客我唔會要啲朋友動手，今次都有邀請朋友E小姐黎，佢仲買埋一紅一白酒上黎。

B先生帶埋佢老婆黎我家，時間過得真快，仲記得7年前有日，B先生突然打長途電話返黎，話佢要結婚返香港擺酒，要我幫佢老婆做姊妹，今日佢地已經有兩個小朋友啦！我地可能太耐無見，一路食…一路傾…一路飲，講下東…講下西…講下近況…講下上當年…講下將來……無諗過佢仲係10幾年前，我識既B先生，佢個人仲係好真好簡單……嘻嘻哈哈咁就開心左一晚。

120812 uWeddings影相日

期久既影相日，緊張擔心左幾個星期，終於到啦！因為關生上午要返工，所以當日堅持下午影相，同埋得我一個人自己出發。雖然下午先影相，但一早訓唔著醒左。朋友成朝不停提醒我要準備好多野去，基於我懶懶行既性格，最後只帶左：內衣、高踭鞋、男恤衫、男鞋、戒指、熊仔…… (朋友講的一半東西都無)

原本約好下午兩點，我地怕遲到點九已上到去，點知對上個對仲影緊第一個做型。佢為左拖延時間就帶我地參觀環境，比我想象中大，但再大都無理由行到一個鐘掛？！時間去到二點九，終於幫我化妝了。化妝師好細心幫我化妝，呢個妝化左九個字。化完妝首先換左婚紗先，開始就影相。攝影師問我有無邊個境特別鍾意，我都佢講好多波波個境，點知波波個境影得最少囉！

影左一個鐘左右，換衫又髮型，因為無乜準備想set咩頭，就由得佢搞啦！點知好似無換髮型咁！換上晚裝真係有啲攰，開始無energy了！但仲有好幾個景未影。攝影師見我地咁攰，佢都開始Hea了。

好唔容易完成影相，到入去換衫時，可怕既事來臨啦。就係比人sell！不停問我：「搵左化妝師未呀？覺得化妝師化得我靚唔靚？滿唔滿意呀？搵左攝影師未？……」救命丫！最怕就係咁比人死sell爛sell架啦！仲想我即時比錢Join？為左大家好落台，我話返屋企諗諗先！

今日兩個字總結：好攰！

只係影左短短三個鐘，仲要係室內有冷氣都覺得咁辛苦，真係好難想象十月尾去3V影華僑城會係點！諗起都有啲驚~

120809 染頭髮

聽身邊朋友講，影Pre-Wedding前記得要染頭髮，因為set個頭會層次分明啲，效果會出啲，咁我就乖乖地去染頭髮啦！

係我太耐無染頭髮，定我年紀大左呢？我接受唔到咁金囉！我明明同個髮型師講要染啡色，點解出黎係金色呢？

120627 3V一再改期

本來BOOK左3V 2/9試衫 & 3/9 影相，但點知關生要求遲少少影，佢話怕行唔開放唔到假，另一方面其實佢怕熱先真！

既然佢開到聲，我就改左10月，仲要拖到月尾29號，到時一定唔熱啦！講下講下到時影相時，我都比左錢3V有一年啦！但其實我都唔想咁早影，因為我而家真係好肥，根本都無瘦過，我開始有少少放棄了！唔通我真係要做個肥新娘子？前排我妹妹拎相，講到佢影得 好差，我真係好擔心，點算呀？

120618 大眼仔con

兩個星期前應承左Blog友『YC』，Post 我帶開覺得幾好既大眼仔con比佢睇下，點知‧‧‧影左相咁耐都無upload上黎，連我都覺得真係過份丫！

經過我多番努力，終於upload到張相上黎啦！呢個colour con 牌子名叫 "Fresh Kon"，我平時係買開黑色同啡色，聽講出左新色灰色同埋仲有混色，但我自己就未試過啦！

啡色帶上去就比較自然，我個人覺得如果染左頭就帶啡色襯啲，對眼自然得黎又精靈。但如果諗住影相& Big Day 個日帶，我就建議大家帶黑色，因為黑色個效果就好好多，帶左上去就成個娃娃公仔眼！

120610 大出血(PS3+Pad)

嘩！今日真係大出血啦！我同關生一人買一個玩具，但好開心！關生想買PS3好耐架，係我成日唔比佢買，怕佢顧住打機唔訓覺！因為呢個玩具相信黎緊會同佢爭電視睇！

而我既新玩具就係Pad，其實我都想買好耐架啦！見人地iPad由1出到而家3都仲諗緊，係因為我真係好怕自己嫌煩，之後放低左部機唔用浪費左。但當我電話轉左用Android機之後，就完全放棄左買iPad了，因為Android實在太方便啦！

我都考慮買Asus定買Acer 好，但基於我對Acer 有偏見，同Asus外型又真係靚仔好多。再加上我細佬買左部同款Asus比媽媽學上網同玩QQ，所以最後我都係決定左買Asus！有左佢，以後做Gym唔怕悶啦！

120528 DIY英文字(1)

成日睇Blog友買英文字母DIY，自己都想試下。但我個組英文字，唔係R就係無F，搞到買左幾次先買得齊囉！因為妹妹在年尾結婚，所以我都買埋佢既LL。

前前後後我買左4次先買齊，仲要有兩個F係黑色，真係唔搞搞佢唔得。咁下一步可以點整呢？

120526 死Sell爛Sell

認真想減肥，買左團購$80。一心諗住玩完一個月先Join，但點知都要死Sell爛Sell。佢想點呀？

真係令人好討厭，明明我覺得價錢合理可以即Join，但因為唔鍾意佢死Sell爛Sell，所以決定聽日先Join玩下先！哈哈~ 唔知係咪返工時間上去，個場可以靜到咁既？

120506 復仇者聯盟

一連兩日去睇戲，今日睇『復仇者聯盟』。好多人都講佢好好睇，但我真係唔太識欣賞，佢除左外界所講咁勁賣廣告外，真係無驚喜。

我同關生睇到有少少瞌眼訓囉 =_= !!! 如果唔係之前買左咁多團購戲飛要係5月尾用哂，我真係唔會睇佢囉！ 真係唔值得推介~

120505 屍營旅舍

因為之前買左好多團購戲飛，所以今日做完飛數，就去買飛睇戲。去到真係唔知睇咩好！但關生想睇『復』，而我就無咩所謂。

排排下隊聽到前面對情侶想睇呢套，我就跟佢買飛啦。哈哈！買完飛就返左屋企Hea下~ 到7點再去沙田UA，一開場套戲都幾悶，又係一班年青人又話去冒險，之後遇到怪人比左忠告唔聽，之後就展開旅程，之後就好多怪事發生咁...

但同一般恐怖片有啲唔同既係竟然有劇情架！啲鬼怪野會係你估唔到既情況下出現，係有人控制囉！如果無去睇戲院睇既朋友，值得推薦買隻碟睇下~

120413 超級戰艦：異形海戰

話說之前買左好多團購戲飛，本身同一班朋友去睇，點知而家就過期但都未約到佢地，唯有同關生解決佢啦，今次唔理咩都睇既戲係佢-超級戰艦：異形海戰。

呢類型既戲，真係唔岩我口味，如果唔係之前買左團購飛就到期，同埋關生想睇，我諗無機會睇到，哈哈！