月頭去健康院產檢 比佢地轉介過屯門醫院跟進 約左朝早 咩都未食係西鐵買美心麵包啦 一心諗住屯門醫院跟進會好啲 點知唔係囉 根本無分別 一樣都只係聽心跳 無超聲波照 咁掉我過黎做咩呢 等時間耐左之餘 仲要遠左咁多 真係比人搵笨
2014年5月29日星期四
2014年5月23日星期五
140523一田購物優惠日2(15w6d)
因為尋日發現買漏野 所以訓醒就再去一田 今次由關生陪我黎行
經過Puma 見到好多BB波鞋仔 實在太可愛 我企係度望左好耐 忍手忍手忍手 要遲啲先買鞋仔呀 而關生見我睇BB鞋仔 佢又走去試波鞋 仲笑自己要轉買平波鞋 慳啲錢比豬B用
之後又去返ChuChu個專櫃 睇返原來佢有好多奶咀頭 我影低相第日要買叫關生去買 行左陣開始多人就走 真係唔想同人迫呀
返到屋企睇戰利品 再買多套ChuChu奶樽
ChuChu既BB洗衫液 Promoter話佢呢隻無味 對初生BB比較好 無咁易敏感
ChuChu既BB洗衫液補充裝
關生今日滿載而歸 買左3對鞋囉 仲話自己轉左買平波鞋 要做個好爸爸 慳啲錢比豬B洗喎
同款買左紅色又買綠色
仲有另一個款既白色
行左2日實在太攰啦 如果仲有野唔齊都無計 遲啲先補飛 今時唔同往日 真係頂唔順咁行街啦
2014年5月22日星期四
140522一田購物優惠日1(15w5d)
今日一田購物優惠日 聽啲媽咪級朋友講 係入貨既好時機 雖然要買乜都未知得清楚 但難得優惠日都去行下 睇下有咩啱買 今次又係我媽咪陪我去行下 我媽咪話想買床單
不過而家啲床單無之前咁抵 最起碼少左張冷氣被 記得之前買係有送埋架 而家乜都貴 連床單都間接加價 可能我地早去 未到收工時間 竟然Line公仔床單仲有貨喎
之後就去我想睇既BB部 真係唔知咩牌子打咩牌子 好似每學一樣新野都要時間適應 原來BB野都勁多牌子 個度有個職員不停介紹Tommee Tippee 電蒸氣煲 佢話超抵 原價$500而家特價$425 計一計即係85折 即係抵唔抵呢
但我個朋友極力推介NUK 佢話佢頭2胎都係用佢 原價$690而家特價$552 圍去8折都真係好似抵啲喎 但阿妹買左個隻牌子呢度無 所以都係睇定啲先決定
另外今日重點要睇既就係BB沖涼液 我問左好多媽咪級朋友 都唔同意見 沖涼液有平有貴唔重要 最緊要阿B用左唔敏感 簡單啲講要出左世先知 但總結最多人推介用瑞士寶寶
去到佢專櫃見到好多套裝 但好似唔係好啱用 好似2支爽身粉套裝咁 $280兩支係平 但買咁多都唔知啱唔啱用 萬一唔啱用就浪費左 諗住睇下就算走人 點知Promoter姨姨突然出現 見我大肚知道未買過 佢都提議我唔好買套裝 單買比較好 同埋揀啲防敏感比阿B 始終初生皮膚比較敏感買好啲
之後就係另一重點要睇既奶樽 好多媽咪級朋友極力推介ChuChu啦 10個媽咪有9個都用緊既 我乜都唔識 個Promoter又勁介紹要執啲咩 我同媽咪聽到哦哦哦 就買左一堆啦
轉身後面就見到有BB車 呢個簡直係最傷腦筋既項目 都唔知買咩牌子 買咩款好 平至幾百貴至萬幾都有 真係好鬼難決定
不過媽咪話BB車可以大啲先決定買 我心諗大左仲可以帶埋豬B黎試車 所以睇完就算 唔會買住 運個吉就走左
拎住袋ChuChu用品都無乜心機行 同媽咪話比完錢就走 排隊途中見到施巴貨架 真係平瑞士寶寶好多呀 不過都係個句 等豬B大啲先再諗轉其他 最緊要佢用
比完錢就搭西鐵返娘家 睇下幾多戰利品 大部分比媽咪爭住拎 雖然個個係我媽咪 但我都勁唔好意思
數下戰利品先 有細佬勁鍾意既Line公仔床單
另外買左怪獸同B.Duck床單
ChuChu系列 洗奶樽液連補充裝
ChuChu系列 乳墊2包
瑞士寶寶系列 沖涼液 爽身粉 同潤膚露
瑞士寶寶媽咪坐月系列 含薑成分專用洗頭水 沖涼液 按摩油
ChuChu系列 奶樽清潔棒
ChuChu系列 奶樽1套4個裝
點知share比媽咪級朋友話我買漏野 4個奶機唔夠 仲有未買洗衣液 咁唯有再去買啦
2014年5月13日星期二
140513元朗容鳳書飲糖水(14w3d)
呢個星期不停聽到媽咪谷講 飲糖水又甜又辛苦 我都好驚 其實佢地唔講 我都唔知咩係飲糖水 原來佢係Check血糖 全名叫葡萄糖耐量試驗 好鬼長呀 健康院要我地8點9前到 之後由姑娘介紹一陣佢地會點做 空肚抽血>飲1大支糖水 呆坐2個鐘>再等叫名抽血 走得 因為人數眾多 大家要耐心等待
最後個女仲大大聲鬧個男無叫佢起身 搞到佢出醜無哂面 其實由頭到尾 都係個女自己發癲引人注意 關生細細聲同我講 「娶個咁老婆真慘 其實你啲脾氣都唔係好臭姐」關生算唔算讚緊我呀
2014年5月7日星期三
140507元朗容鳳書產檢(13w4d)
今日到元朗容鳳書產檢 傳聞中最浪費時間 又最癈既政府健康院產檢 今日一早去左廁所唔記得要留尿 所以買左早餐等留左尿先食 點知人多到唔好意思拎出黎 怕影響到人
真係估唔到多人多成咁 仲要排隊耐成咁 由量血壓>度高磅重>見姑娘>抽血>見醫生 每做一個step都要等成個鐘 我足足未到9點等到1點 好彩關生陪我 如果唔係悶屎我
另外見姑娘同醫生時話我太肥 下星期要一早返黎飲糖水 同埋我講有纖維瘤 醫生話健康院無儀器幫唔到我檢查 轉介我去屯院產檢 寫左轉介信要親自去排期產檢 好鬼煩呀
最後可能我驚血既關係 覺得今日最恐怖既環節就係抽血 足足要抽4支血 我覺得做媽咪真係好偉大 雖然我咁驚血 但我都可以忍耐 為左豬B我乜都可以忍 加油呀
2014年5月5日星期一
140505元朗Dr.Fung產檢(13w2d)
雖然10日前係屯院產檢完 但無相拎返屋企望下 梗係覺得爭啲野咁 3月尾馮醫生話唔洗照得咁密 叫我book六星期照一次 咁就約左今日啦 今日除左關生專登早收工陪我檢查之外 仲有媽咪陪我去睇阿B 我一放工即去診所 可能約左6點3 夜診第2個 所以唔洗點等就到我
返到屋企之後 我同關生不停望張相 仲幫阿B改花名 (因為幾個月前 我陪阿妹照過BB 當時姨甥仔已腳仔長長 應該好高大 所以我叫佢做高腳豬) 而我B腳仔短短 就叫佢做矮腳豬 但關生話唔好聽又唔順口喎 所以關生叫佢做豬B 其實叫咩都好 最緊要阿B健健康康
2014年5月3日星期六
140503又打敗仗(13w)
真係好無鬼用 我打敗仗又發燒 唔睇醫生都唔得 怕阿B比我更辛苦 落左樓下曾醫生睇 佢知道我有BB後 就接住講：其實啲藥都幫唔到你幾多 你要靠自己 聽完就完全知道啲藥會無料到 我好乖咁食藥訓覺休息 希望快啲好返啦 對唔住阿B
訂閱：
留言 (Atom)