140104 小肥牛

失業時間特別多聚會，今日就RN的朋友又搞食食食活動，今次係太子小肥牛打邊爐。其實小肥牛開左咁耐第一次去，加上舊年開始唔食牛，我就更無興趣去，不過一大班人都可以試試既。

今次又有新朋友出黎，次次都有新朋友加入，RN識朋友真係濫，真係勁呀！我地一行11人點左勁多野，多到影唔切相，係咁易影啲交下功課咁啦！佢自稱啲火鍋配料刁鑽喎，不過我同關生就覺得麻麻地，而賣相都算唔錯既。

其中有個新識既女仔住係附近，佢提議食飽飽就諗住食糖水，點知去到兩間糖水舖門口都排長龍，有人提議去遠啲食，點知阿女仔唔肯，要係佢屋企附近先食。之後好低B咁一班人去麥記食雪糕，好搞笑呀！

131228 失業後的第一天

失業後的第一天，我返元朗約左啲好朋友出黎食下午茶，有我好朋友啡+滔+滔B，自從5月後都無見過滔B，無見7個月真係大左好多呀。

 

我一見到滔B就比我抱，可能未識認人無喊，仲同我玩得勁開心！阿B個樣真係同媽咪一模一樣，真係成個餅印咁，真係好神奇架！我就希望我第日既阿B似爸爸，因為我老公既五官比我好，哈哈！

131215 BFD Gathering with啡+清

約左朋友啡同清又聚會下，今日選擇左去飲茶，貪佢坐得耐啲，可以慢慢傾下計。

因為前排清同啡比公司裁員一齊炒左，咁岩我有朋友公司請人，又咁岩請兩個，所以介紹左佢地去做。清已經返左工幾日，啡就講好新年後先返工，老闆又肯等佢過埋年先返。清既話題就係講份新工啦！其實都係既，每轉一份工都需要時間適應，尤其清今次係轉型。呢個時候真係幫唔到啲咩，做朋友既只可聽佢呻下同鼓勵下佢。

而啡就計劃緊，同男朋友去「台灣一個月背包遊」，真係好羡慕啡呀！佢見左工都唔返工住，就係呢個原因。咁岩佢同男朋友都突然比公司炒左，正好可以一齊去旅行。都好既，去旅行叉個電，返黎可以重新出發。

大家傾到咁上下，就提議去食甜品。之前成日聽朋友講去試新甜品，咩食泥丫，又話咩分子，今日大家都想去試下。去到點左3款甜品試下，先講賣相係靚既，但味道一般，我地都話未必會再食，而大家都認為係好睇唔好食。嘻嘻哈哈又一日！

131201 探妙B仔

早一個月前已約好既睇B團，幾經辛苦終於成功約齊人，我地齊齊向西環妙家出發！

因為我屋企呢頭無直車過海，我就搭巴士到深水埗轉車，順便拎埋早幾日一田買既BB被比瀅B，之後再轉車去西灣。

去到阿B長期訓覺狀態，雖然係咁我地都不停幫佢影相，阿B著到成隻糭咁，隻手仔軟綿綿好得意呀！

我抱左佢好耐，大家都笑我真係好鍾意小朋友。因為阿B既嫲嫲帶左班朋友黎探B，所以食左碗薑醋我地就走了。

131130 生日大快樂(多謝家人)

逢星期六全家人都習慣回家一齊食飯，今日就順便幫我補祝生日，特別多謝妹妹，專登買左個靚靚Kitty蛋糕比我，等我可以吹蠟燭，仲祝我願望成真。 蛋糕好睇又好食，我地拎住個蛋糕玩多過食。只要係一家人開開心心，做咩低B野都一樣開心。

131129 生日大快樂(多謝黎氏一家)

我契仔一早約左我慶祝生日，今晚OT埋成8點半先到，真係好唔好意思丫！一見到我可愛既契仔，頭先OT既怨氣消失哂，心情即時好返。小朋友真係好純真，好簡單咁表達自己，鍾意就鍾意唔鍾意就唔鍾意，唔鍾意比關生抱會講唔好。我抱住佢影相時不停摸住我塊面，真係好sweet丫！

131127 生日大快樂(多謝明+啡)

仲有2日生日，今次有我兩個好朋友請我食飯，食我最鍾意既日本菜。真係好開心，朋友記得自己生日係一件好幸福既事。今日我地去左荃新天地1期既鳴門，可能我地早入去，成間餐廳無乜人，我地坐卡位好舒服夠闊落。

 

之後我地3個人都叫左好多野食，不過黎到都細細件食落係好味，但我覺得就唔抵食，一串串燒都要$2x蚊，朋友請都有啲肉痛，不過啲魚生同刺身又真係好新鮮。

你串下我我串下你，嘻嘻哈哈又一餐，食飽飽後我地再戰糖水。

人大左身邊真正既好朋友越黎越少，老土啲講句：我會好好珍惜你地！

131120 MLC Gathering

識左超過10年既朋友，會記得我生日約我食飯，真係一件勁開心既事。

雖然耐耐先約一次食飯，但出到黎話題滔滔不絕。

多謝你地為我預祝生日~

131116 PEO Gathering

11月份又到PEO舊同事既聚會，因為穎兩個女都11月份生日，年年呢個時候大家都會去東涌，上去穎家開生日Party。今次仲多左琪+堅+佢地個B女希希，原來希希都係11月生日既。咁大班人最好既都係打邊爐，穎家仲有印傭姐姐幫手真係好。

 

除左個1歲B女希希第一次參加聚會，仲有地同拎既半歲B女瀅瀅，第一次見面好得意，肥嘟嘟好好肉地架！唔驚人之餘仲好鍾意笑，真係好得人錫架！

大人細路食飽後，就係唱生日歌切蛋糕時間，小朋友等左成日都係等呢一刻咋！大家一齊唱生日歌真係好開心！我地仲約好新年初七再聚會，到時拜年派利是。嘻嘻~

131113 CSC Gathering

今日約了幾個CSC舊同事係九龍城食飯，真係幾耐無見啦！可能大家都做同職位，就算我地日日都係whatsapp個group到傾計都好，多數都係討論工作上既事點解決。加上大家都真係好忙，呢個飯局由9月頭約到今日，終於成功出到黎啦！

我地4個曾經係同1間公司工作，而家只有1個仍然留低做緊，出黎都少不免講下舊公司啲最新動態，同埋啲舊同事尤其係個個舊上司。其實我好慶幸自己離開左呢間公司，離開左呢個乜都唔識靠識人上位既女魔頭，如果我繼續做實比佢迫死。

當然大家會呻下新公司，WW轉左做外國公司，估唔到人事分別咁大，佢話完全無是非真係岩哂我。諗諗下我做緊間公司，真係無得比。大家傾到唔捨得走，就轉場隔離食糖水，間中一次出黎見下面真係好開心，期待下次聚會。

131109 RN萬歲BBQ

我有朋友RN出哂名係FB王，任何朋友update自己FB既status，RN都會係第一時間回覆，即使唔打comment都會有個讚好，就係因為咁，RN一update自己FB既status，我地都會學佢咁係FB不停勁留言，雖然大家唔識，但久而久之大家都熟左，得閒就齊齊係RN個FB搞事啦。

突然有日大家傾到興起話搞BBQ，咁就定左今日搞啦！我地有個朋友住村屋既，門口有個好大個空地，搞BBQ一流丫，所以成20人咁入左去玩，最特別係有一半人係唔識既。

因為佢地話唔識買，所以我同關生幫手買海鮮，入到去佢地係度玩緊啤牌。雖然第一次見，但大家見到面真係好似好熟咁喎！就好似失散左好多年，而家搵返大家相認咁。

洗好放出黎先發現，我地真係買左好多野。估唔到關生咁雀躍，當晚成為左大廚，幫大家燒野食。可能唔識個一半多數年紀比較細啲，同佢地玩好似以前細個，當燒左野出黎爭住食，真係好好玩。希望再有一次活動啦~ 

131106 與啡友見面

仲記得細個個時興ICQ(大家知我咩年代啦)，身邊啲朋友好鍾意約啲網友出黎見面，估唔到係呢個年代，我都會約啲唔識既人出黎，不過唔係網友係啡友。點解叫啡友呢？其實意思係「咖啡友」。話說早幾個月，我係Line度download左隻game，個名叫「I Love Coffee」，相信身邊好多朋友都有玩呢隻game，咁岩比我發現係FB有呢個game既group，就咁我識左好多玩呢隻game既台灣朋友啦。

一直以黎，我地一大班人係group傾計。尋日突然有一個啡友「魚魚」話今日要跟男朋友黎香港開會，開完會有半日時間玩，問我地有咩地方推介去玩同濕平。而group中另一香港人「馮太」介紹左好幾個地方比佢。點知越講越高興，話佢表姐想買Cookies Quartet的蝴蝶酥做手信，但佢開會地點係葵興，而分店係九龍城...銅鑼灣...沙田...尖沙咀...屯門...真係唔近，加上佢又唔識路，我唔建議佢周圍去。諗一諗我就應承幫佢買，之後拎過去葵興比佢。

尋日收工搭車過沙田幫魚魚買，其實聽過Cookies Quartet好耐，但真係未試過。去到門口見到間舖細細地，有好多個樽，原來係比客試食架，我試左蝴蝶酥同朱古力曲奇，真係好香好味喎！之後我就買左兩盒魚魚order的原味蝴蝶酥，另外買左兩盒9味雜錦曲奇餅，一個盒送比魚魚，另一盒買比自己食。後未馮太話佢話同我夾一半錢，突然發現我地香港人都好好客，哈哈！ 

今日返工就帶埋三盒餅返工，原來都好重下，到lunch早少少搭車過葵興。我同馮太約左係葵興站等，再一次上去搵魚魚。上到門口呆左一下，點解佢講既517室既門口係咁既？之後我send左個msg叫佢出黎啦！哈哈，終於見到真人了！真人比睇相高啲，同埋佢真係好nice架！台灣人同大陸人真係好唔同，雖然大家都係講普通話，唔怪得啲男人話台灣女仔溫柔好多，我都覺得係丫！哈哈~

因為我啲普通話真係好普通，但聽係無問題的，所以好少出聲，只係係側邊傻笑傻笑同傻笑 。魚魚見到我幫佢買既手信，佢好開心，我地話唔收錢，佢勁唔好意思！起初我地約好過去同魚魚一齊食飯的，但因為佢男友的同事已Book位同佢地食飯，所以就只係傾下計。但都好開心，逗留左一個鐘就走了。希望佢下次黎，我會識講多啲普通話，同魚魚溝通到啦！嘻嘻~

131025 Dinner with啡+清

人大左身邊既朋友都少左，結婚既結婚，生仔既生仔，佢地都漸漸同我地少左聯絡，甚至失埋蹤。以前逢生日都會一大班朋友去唱K飲酒，而家我老啦！真係捱唔到啦。我今日就同2個壽星女補祝生日，簡簡單單幾個朋友咁食下飯，傾下計都好開心。