131130 生日大快樂(多謝家人)

逢星期六全家人都習慣回家一齊食飯，今日就順便幫我補祝生日，特別多謝妹妹，專登買左個靚靚Kitty蛋糕比我，等我可以吹蠟燭，仲祝我願望成真。 蛋糕好睇又好食，我地拎住個蛋糕玩多過食。只要係一家人開開心心，做咩低B野都一樣開心。

131129 生日大快樂(多謝黎氏一家)

我契仔一早約左我慶祝生日，今晚OT埋成8點半先到，真係好唔好意思丫！一見到我可愛既契仔，頭先OT既怨氣消失哂，心情即時好返。小朋友真係好純真，好簡單咁表達自己，鍾意就鍾意唔鍾意就唔鍾意，唔鍾意比關生抱會講唔好。我抱住佢影相時不停摸住我塊面，真係好sweet丫！

131128 生日大快樂(多謝關生)

關生話我生日正日比人約左，佢預早一日同我慶祝。我地兩公婆都好鍾意打邊爐，尤其係屋企打點食都得，所以佢老遠去買海鮮返屋企打。真係好開心~

131127 生日大快樂(多謝明+啡)

仲有2日生日，今次有我兩個好朋友請我食飯，食我最鍾意既日本菜。真係好開心，朋友記得自己生日係一件好幸福既事。今日我地去左荃新天地1期既鳴門，可能我地早入去，成間餐廳無乜人，我地坐卡位好舒服夠闊落。

 

之後我地3個人都叫左好多野食，不過黎到都細細件食落係好味，但我覺得就唔抵食，一串串燒都要$2x蚊，朋友請都有啲肉痛，不過啲魚生同刺身又真係好新鮮。

你串下我我串下你，嘻嘻哈哈又一餐，食飽飽後我地再戰糖水。

人大左身邊真正既好朋友越黎越少，老土啲講句：我會好好珍惜你地！

131125 大出血(一田篇)

一田減價左幾日都抽唔到時候過去睇，今日係最後一日，點都要入去兜個圈既，點知一個人入去都可以行左3個鐘囉。今日就去左新開既荃灣分店，由第一層開始睇起，起初我係咁睇頸巾披肩，真係好多人揀好似搶咁。後未見到媽咪用開既Lesportsac袋做緊8折，當然要買個比媽咪啦！

之後上第二層勁多人，啲床單真係好抵，但對上一田特價買得太多床單，所以齋睇無買。之後去左睇童裝，見到有人睇緊BB被，個sales話黎緊天氣會凍，介紹張兩用被好正，我買左兩張，紅色比拎B女，藍色比妙B仔，不過要三日後先有貨，唔緊要唔急既。再繼續行見到Puma波鞋特價，諗左一陣關生著開Adidas既，買Puma會唔會唔著呢？最後買左兩對，唔鍾意就叫關生著黎開工啦！之後精品……女裝……都無收穫。

再上一層到廚具個層啦！我想買隻新穫，呢排我都周圍睇，前幾日去過千色睇過。朋友叫我忍多個月，千色通常都會聖誕做優惠。但今日黎到一田睇廚具，先發現千色未做優惠都平過一田特價，咁兜左個圈就走左。

最後我買3條披肩，一個袋送比媽咪，兩對波鞋比關生，仲有BB被比朋友既B仔同B女。幾時都話，女人錢真易賺~ 

131124 Yannes & Martin Wedding

今日去元朗參加Y&M 既婚宴，其實都好搞笑，點解我會同Yannes係朋友，因為我同佢媽咪KF之前係同事，以前逢新年都會上舊老世屋企拜年，KF就帶埋兩個女去玩，我就係個時認識Yannes既，當時佢好細個仲係小妹妹。

 

Y&M 婚禮今日舉行了，回想起一年前我地一齊行婚展，佢陪我去揀Pre-Wedding著既裙，咁快就到結婚既時間，時間真係過得好快。KF早幾日已whatsapp提我8點註冊，所以一早到場同佢地影相，之後同啲舊同事傾下計。

今日被安排坐係一班舊同事的一圍，傾傾下計先發現，其中只有一人仍然係舊公司工作。全圍人都轉左新公司，只有我一人轉了行，其實諗返做同事既日子都好得意。

吹吹下水就開始啦，Yannes同Martin步入會場，現場氣氛好好丫，慢慢步上台後就係証婚儀式。其實請律師即場註冊既証婚儀式，我睇過不止10次，但今日個律師確係口水比較多，同事們攞黎講笑話佢似睇相佬，我個人覺得長氣不是問題，但重點係律師說話內容，令到一對新人尷尬先唔好。簽紙後係例牌錫錫，估唔到佢地完全唔怕醜，錫到打側哂頭轉埋身，勁！

之後開席啦！我地舊同事食野傾下計，聽下某人發噏瘋亂講說話，嘻嘻哈哈咁就到敬酒時間。

Yannes換了一身紅裙，cutting簡單顯得非常大方，加上勁多金器勁有睇頭丫！因為都成30圍，所以敬酒時間比較長。

之後到後補影相，因為太多賓客，影相影到換唔到靚靚黃色送客晚裝。

最後影完大合照我都離開啦！祝Yannes同Martin白頭到老，快啲生個肥肥白白既BB。

131123 妹妹送的生日禮物

好開心，今日收到妹妹送的生日禮物。

同以往一樣我同妹妹買咩都同款兩份，好多時我同佢用既野都好相似。妹妹另外買左個啡色，比我揀先既，但我鍾意個紫色多啲。開心唔係佢既價值或送咩比我，而係有心記得我生日，一家人和和睦睦，關心大家就好開心。哈哈^_^

131120 MLC Gathering

識左超過10年既朋友，會記得我生日約我食飯，真係一件勁開心既事。

雖然耐耐先約一次食飯，但出到黎話題滔滔不絕。

多謝你地為我預祝生日~

131117 重新整理Blog

之前麻煩左Blog友YC一個下午，教我由Yahoo搬過黎Blogspot，搬左之後我睇返先發現，好多Blog唔見左 >_< 我迫於無奈，再去Yahoo重新Copy過黎，順便Copy埋啲相啦！不過無哂之前啲留言lu~

其實因為之前仲係Yahoo打Blog時，已經打落好多Blog未Upload上去，襯住呢個機會，慢慢整理Upload埋上黎，黎緊會見到多補文啦！哈哈 ^_^

131116 PEO Gathering

11月份又到PEO舊同事既聚會，因為穎兩個女都11月份生日，年年呢個時候大家都會去東涌，上去穎家開生日Party。今次仲多左琪+堅+佢地個B女希希，原來希希都係11月生日既。咁大班人最好既都係打邊爐，穎家仲有印傭姐姐幫手真係好。

 

除左個1歲B女希希第一次參加聚會，仲有地同拎既半歲B女瀅瀅，第一次見面好得意，肥嘟嘟好好肉地架！唔驚人之餘仲好鍾意笑，真係好得人錫架！

大人細路食飽後，就係唱生日歌切蛋糕時間，小朋友等左成日都係等呢一刻咋！大家一齊唱生日歌真係好開心！我地仲約好新年初七再聚會，到時拜年派利是。嘻嘻~

131115 大出血(Clinique篇)

每逢聖誕前夕都會大出血，去到邊都做緊聖誕優惠，尤其是護膚品化妝品個啲舖頭，本身我個人好懶於護膚，但行過見到咁抵，都一定會忍唔到手，今日中伏既係Clinique。

 

忘記左申報利益:「我係Blog分享任何野，都係自己真金白銀買的，我唔係打手幫人賣廣告的」。話時話，唔知做打手有咩著數既呢？我都好想知呀！

上星期收到聖誕優惠Promotion寄黎，因為我之前用開暗蒼系列，而家轉天氣見做Promotion做保濕優惠，忍唔住叫左妹妹一齊去睇。睇下睇下比人sell下sell下，妹妹買左2 sets，我見自己個啲就用完，就買左4 sets。不過真係好抵呀！

131113 CSC Gathering

今日約了幾個CSC舊同事係九龍城食飯，真係幾耐無見啦！可能大家都做同職位，就算我地日日都係whatsapp個group到傾計都好，多數都係討論工作上既事點解決。加上大家都真係好忙，呢個飯局由9月頭約到今日，終於成功出到黎啦！

我地4個曾經係同1間公司工作，而家只有1個仍然留低做緊，出黎都少不免講下舊公司啲最新動態，同埋啲舊同事尤其係個個舊上司。其實我好慶幸自己離開左呢間公司，離開左呢個乜都唔識靠識人上位既女魔頭，如果我繼續做實比佢迫死。

當然大家會呻下新公司，WW轉左做外國公司，估唔到人事分別咁大，佢話完全無是非真係岩哂我。諗諗下我做緊間公司，真係無得比。大家傾到唔捨得走，就轉場隔離食糖水，間中一次出黎見下面真係好開心，期待下次聚會。

131109 RN萬歲BBQ

我有朋友RN出哂名係FB王，任何朋友update自己FB既status，RN都會係第一時間回覆，即使唔打comment都會有個讚好，就係因為咁，RN一update自己FB既status，我地都會學佢咁係FB不停勁留言，雖然大家唔識，但久而久之大家都熟左，得閒就齊齊係RN個FB搞事啦。

突然有日大家傾到興起話搞BBQ，咁就定左今日搞啦！我地有個朋友住村屋既，門口有個好大個空地，搞BBQ一流丫，所以成20人咁入左去玩，最特別係有一半人係唔識既。

因為佢地話唔識買，所以我同關生幫手買海鮮，入到去佢地係度玩緊啤牌。雖然第一次見，但大家見到面真係好似好熟咁喎！就好似失散左好多年，而家搵返大家相認咁。

洗好放出黎先發現，我地真係買左好多野。估唔到關生咁雀躍，當晚成為左大廚，幫大家燒野食。可能唔識個一半多數年紀比較細啲，同佢地玩好似以前細個，當燒左野出黎爭住食，真係好好玩。希望再有一次活動啦~ 

131106 與啡友見面

仲記得細個個時興ICQ(大家知我咩年代啦)，身邊啲朋友好鍾意約啲網友出黎見面，估唔到係呢個年代，我都會約啲唔識既人出黎，不過唔係網友係啡友。點解叫啡友呢？其實意思係「咖啡友」。話說早幾個月，我係Line度download左隻game，個名叫「I Love Coffee」，相信身邊好多朋友都有玩呢隻game，咁岩比我發現係FB有呢個game既group，就咁我識左好多玩呢隻game既台灣朋友啦。

一直以黎，我地一大班人係group傾計。尋日突然有一個啡友「魚魚」話今日要跟男朋友黎香港開會，開完會有半日時間玩，問我地有咩地方推介去玩同濕平。而group中另一香港人「馮太」介紹左好幾個地方比佢。點知越講越高興，話佢表姐想買Cookies Quartet的蝴蝶酥做手信，但佢開會地點係葵興，而分店係九龍城...銅鑼灣...沙田...尖沙咀...屯門...真係唔近，加上佢又唔識路，我唔建議佢周圍去。諗一諗我就應承幫佢買，之後拎過去葵興比佢。

尋日收工搭車過沙田幫魚魚買，其實聽過Cookies Quartet好耐，但真係未試過。去到門口見到間舖細細地，有好多個樽，原來係比客試食架，我試左蝴蝶酥同朱古力曲奇，真係好香好味喎！之後我就買左兩盒魚魚order的原味蝴蝶酥，另外買左兩盒9味雜錦曲奇餅，一個盒送比魚魚，另一盒買比自己食。後未馮太話佢話同我夾一半錢，突然發現我地香港人都好好客，哈哈！ 

今日返工就帶埋三盒餅返工，原來都好重下，到lunch早少少搭車過葵興。我同馮太約左係葵興站等，再一次上去搵魚魚。上到門口呆左一下，點解佢講既517室既門口係咁既？之後我send左個msg叫佢出黎啦！哈哈，終於見到真人了！真人比睇相高啲，同埋佢真係好nice架！台灣人同大陸人真係好唔同，雖然大家都係講普通話，唔怪得啲男人話台灣女仔溫柔好多，我都覺得係丫！哈哈~

因為我啲普通話真係好普通，但聽係無問題的，所以好少出聲，只係係側邊傻笑傻笑同傻笑 。魚魚見到我幫佢買既手信，佢好開心，我地話唔收錢，佢勁唔好意思！起初我地約好過去同魚魚一齊食飯的，但因為佢男友的同事已Book位同佢地食飯，所以就只係傾下計。但都好開心，逗留左一個鐘就走了。希望佢下次黎，我會識講多啲普通話，同魚魚溝通到啦！嘻嘻~

131105 PHILIPS洗面機

最近我弟婦買左部PHILIPS洗面機，佢話洗得好乾淨，搞到我又心郁郁想買黎試，但今次點都唔會唔會唔會唔會再買水貨！但估唔到越想買就越買唔到，搵左好多間百老匯周圍都無貨，佢地串到唔係間間都肯留電話，好似唔休做生意咁。 

自從上星期團購Beecrazy既Hitach導入機成功退款後，我又身痕想買過部，因為之前搞左一年多都未真正用過，真係好想試下係咪咁好用呀！

 

因為聽日有個朋友黎香港，我幫佢去沙田買手信拎比佢，咁岩得咁橋我尋日係沙田留電話要既洗面機有貨，真係幸運！諗諗下，如果我落左訂的話，佢地未必會第一時間打比我添！