111211 Treron & Wayne Wedding

連續兩日去飲，今日比尋日開心好多，今日就係我好朋友阿狗結婚，真係恭喜佢丫！

我呢個朋友好有創意架！細個讀書時已成日畫公仔，整呢樣整個樣！所以佢個婚禮佈置全部自己設計，真係好靚好有心思！仲有見返好多同學仔，見到佢地真係好開心，開心到飲多左幾柸！計計數我同新郎哥識多好多年，一齊讀書‧一齊成長‧睇住佢成家立室！祝佢地新婚快樂‧白頭到老！

111210 Ying & Benny Wedding

今日阿影結婚，因為同日關生既朋友個B擺滿月，所以我代佢出席婚宴。可能因為我唔識佢啲朋友(只係識朋友H)，所以成晚我都覺得好悶。

不過世事就係咁橋，係擺酒前阿影好幸運發現自己有左，半年後又飲滿月酒。唔知個B會係仔定女呢？

111205 恐嚇信

想嚇死人咩？打開信箱見到封恐嚇信，又係上手業主既蘇州屎屎屎屎屎。

我戰戰兢兢打比呢個華哥，開頭佢啲語氣真係好差。但當我講清楚比佢知咩事時，佢態度竟然變哂，變得好有禮貌。每個月都有大大小小銀行財務公司寄信追數。聽隔離屋講我未搬黎之前，直程有人貼埋大字係屋企鐵閘，迫不得已先搬走。希望唔好再收到呢啲恐嚇信啦~

111204 豬仔最後一程

回想起豬仔一出世真係好細隻，啲顏色又唔靚無人要佢！到我接佢返屋企，佢只係敢係廁所入面，唔敢出廳玩。到左今日又係我親自送佢走~


揀個一個好可愛既樽，放骨灰同佢最愛既出街狗帶入個樽到。

屋企仍然保留，豬仔呢個小天地。

111203 堂家姐結婚

今日我堂家姐係尖沙咀好彩補擺酒，我地成家人都有出席，見到好多年無見既親戚。例如文質彬彬既堂細佬，佢去左外國讀書都好幾年，再見返佢真係覺得大個左好多。仲有兩個堂細妹，好多年新年都無見過佢地，亭亭玉立，靚女左好多。

好唔容易先等到開始，大家都預左一對新人會多謝家人。點知‧‧‧我堂家姐多謝佢契媽！仲講咩發夢見到佢，淨係多謝都多謝左十幾分鐘‧‧‧而自己個爸爸﹝即我大伯﹞一句都無提過。

到我擺酒時，究竟要講啲咩呢？真係要諗諗先！

111202 註冊日(豬仔篇)

其實結婚本來係一件開心事，但我就變成傷心事。在我註冊當天起床的時候，我的寶貝狗『豬仔』離開了我。令我呢一生一世都會記住呢一日，連當時註冊都好唔開心。雖然註冊後去左酒樓擺兩圍，聽到賤人講難聽說話都無反應，因為我只急住想返屋企處理豬仔身後事。

呢張相係豬仔走時既相片，豬仔係佢最愛既菠蘿床裏離開。好多人都信唔信人死左之後，會變飛蛾返屋企探親人。

我本人就好相信。第一次就係婆婆係舊年走個時，我訓前見到好大隻又黑又大隻既飛蛾，開頭無為意係咁趕佢，點知趕極都唔肯走，好似飛黎睇我咁！第二次就係豬仔，有隻飛蛾仔飛左返黎係天花板，睇左我地成晚。

111202 註冊日

沒有華麗既婚紗‧‧‧
沒有盛大既婚禮‧‧‧
只有簡簡單既兩家人觀禮，之後食飯。

就係咁我就成為左『關太』了。

同日我既愛犬離開左，關生擔心我唔開心，所以決定後補擺酒。等我有啲野忙，可以寄託一下。但有咩要搞呢？

111129 花球(1)

唔著婚紗註冊，究竟仲買唔買花球呢？我個人鍾意鬱金香同紫色，相信街都好難有呢個組合，好少花球會選用紫色的。係Yahoo拍賣網難得見到，其實我開頭都有諗有無必要買，結果買黎影下相都好！

放工約左大子地鐵站交收，賣家好準時一早到左。一見面佢叫我檢查左先，如果無問題先比錢，比人感覺好均增。係地鐵站拎上手望無問題，返到屋企再仔細望先發現大細邊，不過係可接受的。你地睇下左面係個賣家post上Yahoo拍賣既Sample，右面就係我收到既實物！

111026 Join 3V

經過一番研究，我決定左Join 3V $6999 華僑城Plan。因為妹妹Join左，下年2月14號影櫻花，所以大家都可以減$200。同埋唔係間間都可以係『華僑城』影相，而呢間係其中一間可以影得。

加上上網睇好多香港人都係度影，評價仲要好唔錯，個個都讚佢啲Service好，所以最後選擇左3V。暫時Book左下年3月11號影啦！好期待丫~ 

110511 結婚戒指(2)

登登登櫈！呢對就係我隻簡單款結婚戒指啦！

終於等到拎結婚戒指啦！點知去到發現之前個Sale掉走左，因為我自己去拎，所以只可以試自己個隻，而關生個隻要返屋企試，如果唔岩一個星期內可以免費改。不過唔知點解，我覺得自己隻戒指好似緊左啲~

110420 求婚戒指(2)

上午收到電話隻戒指拎得，開心到午飯時間已經急不及待去拎啦。落左單一星期隻戒指已造起，Pinkbox效率真快！

去到好開心即刻拎出黎試帶。嘩！好靚丫。之後又拎多次上次睇中個隻戒指黎帶，真係好靚丫，但真係唔可以而家買囉！洗洗戒指，對埋證書同鑽石個冧巴。岩，走人！返到公司仲偷偷地拎出黎睇，偷笑之後又收埋，重覆左好幾次，有同事以為我傻左囉！

110413 求婚戒指(1)

人地買求戒指求婚，我同關生就唔同，因為關生平時唔會帶結婚戒指，所以買多隻戒指比我，佢話就當係求婚戒指喎！

話說上次睇結婚戒指時，就已經睇過Pinkbox諗住落單。但個班Sales好似羅湖商業城買野咁，係咁問你有無心買，有心就買好啲。我夠知買鑽石梗係買越大粒，越高級數越好啦！今時今日係香港，呢套服務係唔work架！

但隔左幾成個月，我仲不停諗住Pinkbox隻戒指，關生話當係求婚戒指，叫我平時帶呢隻！所以我決定去鑽石山分店睇多次！同一間公司唔同分店，服務真係差得遠丫！個Sale都不停拎好多款比我選擇，我都好唔客氣試左好多款！大穫！試下試下多左一個款鍾意，我考慮期間佢地都係比意見我無迫我，最後我都係揀返原先個隻！個Sale仲好好笑容，叫我下次再試個隻，等生日時叫男朋友送！

呢次買戒指真係好舒服好開心，氣氛好好！落左單之後，要等到月尾先有得拎！

110306 結婚戒指(1)

因為關生返工做野唔方便帶戒指，所以我地一早打算買對簡單款。目的係註冊時用交換戒指儀式既，所以價錢唔會買太貴，最多買多隻貴啲戒指比我平時帶。

係九龍灣德福，行左好幾間大型金行，周字派、乜福物福……個啲都唔岩我心水or筆直。最過份係Pinkbox，明明我睇中左個款落單，唔明點解係咁Sell我揀另外一個。好煩呀！感覺好似去羅湖商業城買野咁，不停問我有無心買？佢地係咪有病架！得你一間Pinkbox咩？

當我地氣餒想擇日再睇時見到PN。諗住睇埋就走，點知係廚有驚喜！其實一直都知PN係有對戒，但無諗過真係咁多款。加上估到唔個Sale Alan咁Nice，我地揀左好多款試帶，Alan都保持10分笑容，非常親切有禮。

試左15分鐘，已經搵到心目中鍾意個啲款，就即刻決定落單。Alan話仲有刻名服務，開頭諗住刻自己個名算，但sale提議兩個名加哂中間加個心，我好開心即時話好！因為要訂造需時2個月無咁快拎得，希望出黎效果係好啦！