140628公公朋友送衫仔(21w)

公公今日收到拎左兩大包衫返屋企 原來有個朋友係大陸開廠做BB衫 佢每個款都執左兩件比我地 其實係一袋比阿妹 一袋比我 好開心 豬B多左一大堆衫黎著 又可以慳唔少 我地豬B真係好幸福呀 

140627uBaby坐月講座(20w6d)

估唔到尋日臨急臨忙上網 睇到uBaby搞陪月講座 即報名即有人覆有位 我同我9月預產期既好朋友R一齊都去聽下 我地約左佐敦等

上到去先知佢地係間樓上舖 好多野都有得賣 床仔 尿片 紗布…… 淋淋沈沈都有幾齊下個隻 未夠鐘聽講座 我同朋友R周圍參觀下

行左一陣講座開始 齊齊入去聽 有個好有經驗既陪月姐姐介紹 有咩會由佢地可以幫手做 其實佢地講既內容都好表面 或者佢地主要目的係sell陪月服務啦 聽完講座賣張問卷 有禮物拎

禮物有兩包無用既野 一包有5小包唔飲既挼乳茶茶包 另一包係BB洗衣粉 之前聽啲媽咪級朋友講 唔好用洗衣粉洗阿B衫 要用洗衣液比較好 

之後我就同朋友R去左食晚飯 一向聽開佢老公好嚴謹 自從有左阿B後唔比佢亂食野 竟然今晚作反 同我食八方雲集 仲要食酸辣湯好鬼大膽

而一早無戒口既我 當然陪佢食啦 我地仲叫左麵線 餃子同窩貼

大家有傾有講 嘻嘻哈哈咁食野 直到佢老公打黎吹佢走 我地先捨得走 

140626屯門醫院產檢(20w5d)

又係返黎屯門醫院產檢 真係好無聊囉 等得耐過健康院 仲遠左咁多 最慘又係同健康院一樣 只係聽心跳 咁我掉我黎屯門醫院做咩呢

聽完心跳後 我就問醫生 其實係屯門醫院同健康院產檢有咩分別 佢竟然答我無 之後同我講轉介返我去健康院產檢 最慘係要自己打去再約 好丫 好似人球咁再比人掉走啦 

140622買鞋(20w1d)

今日關生難得放假陪我 我地去左行街街 經過一間叫Union既鞋舖 關生突然停低 話要買鞋比我 原來佢留意到我每次出街綁帶都就住就住 驚遲啲個肚再大時穿唔到 但又唔想我著拖鞋出街 驚比人踩到好危險 最後佢揀左呢個密頭鞋款 雖然係肉酸左啲 但佢話夠安全同舒服 真係估唔到關生都有細心既一面 豬B令關生改變唔少

140603元朗Dr.Fung產檢(17w3d)

 

又到1個月1次探豬B既時間啦 呢幾日發現隔得耐無見 個心會好唔安落 可能早幾日開始無左反胃既感覺 個人突然又好擔心有事 加上而家無工返 個人無聊又成日胡思亂想 諗好多負面既野

等左半個鐘左右 就入去馮醫生照超聲波 一開始又係照粒纖維瘤先 今次size又大左1cm 馮醫生話都算大得快 不過佢偏向左面 未影響到阿B 唔洗太擔心 而照豬B時 佢對腳仔勁郁 睇到我同關生好感動 而媽咪都好興奮 聽到馮醫生話佢好健康 心情都勁好 多謝上天保佑我豬B健康成長