140105 新相機(Canon)

唔洗返工真係洗錢更嚴重，今日我又濕平了 

一早想買部輕巧既相機，但之前買左部Samsung相機影出黎都好靚，真係無藉口再買第二部，但今日為左某個原因，我就買左部Canon相機啦！

同Samsung相比真係細好多，平平地隨身攜帶好方便，我黎緊去邊都會帶住佢啦！哈哈哈哈~

140103 續回鄉卡

之前成日都話自己返工無時間，多多藉口唔逐啲過左期既証件﹝例如：回鄉卡、車牌、平安卡、護照…﹞，趁住呢個假期好好咁處理一下。今日我就搞第一樣野，就係續回鄉卡啦！因為唔洗好似以前咁排隊攞籌，可以網上預約好方便，到時到候出現整就得。

今日就預約左晏晝2點去整，我早左一個鐘到，無理照去櫃台拎籌，點知佢又比我喎！拎完籌就落去影相$40大元得4張，但中旅社包收貨，聽講舊年開始做回鄉卡的相片要求高左，所以我諗住係中旅社影相，但無諗過真係嚴謹到呢個地步：兩邊頭髮要攝耳仔，前面頭髮唔可以遮住條眉，仲有要望鏡頭笑。唔洗講我梗係影到好肉酸，不過無乜所謂，反正只係過關先拎出黎。

 

影完相就坐低等叫名啦！等左一陣就到我，估唔到而家咁先進，做証既人要望鏡頭影相記錄，話咁快就搞掂，走得！仲有3樣野未續，我要襯住呢個悠長假期，過續哂呢啲証佢啦！ 

131208 還太歲吉日

年年都攝太歲，因全家都有不同生肖，所以無論有無犯太歲，我都會順便拜一拜求安心。 

我一早約左朋友婷一齊去還神，因為年頭一齊攝，年尾就提佢還。

朝早係蓬灜仙館隔離既香燭舖等，我先到同比較多，所以搵老闆幫我寫左先，寫好一陣朋友婷就黎左。

其實一個人還7份都幾誇張，不過我鍾意負責幫埋屋企人拜神，可以保佑我地一家人平平安安。

最緊要身體健康~

131128 生日大快樂(多謝關生)

關生話我生日正日比人約左，佢預早一日同我慶祝。我地兩公婆都好鍾意打邊爐，尤其係屋企打點食都得，所以佢老遠去買海鮮返屋企打。真係好開心~

131123 妹妹送的生日禮物

好開心，今日收到妹妹送的生日禮物。

同以往一樣我同妹妹買咩都同款兩份，好多時我同佢用既野都好相似。妹妹另外買左個啡色，比我揀先既，但我鍾意個紫色多啲。開心唔係佢既價值或送咩比我，而係有心記得我生日，一家人和和睦睦，關心大家就好開心。哈哈^_^

131117 重新整理Blog

之前麻煩左Blog友YC一個下午，教我由Yahoo搬過黎Blogspot，搬左之後我睇返先發現，好多Blog唔見左 >_< 我迫於無奈，再去Yahoo重新Copy過黎，順便Copy埋啲相啦！不過無哂之前啲留言lu~

其實因為之前仲係Yahoo打Blog時，已經打落好多Blog未Upload上去，襯住呢個機會，慢慢整理Upload埋上黎，黎緊會見到多補文啦！哈哈 ^_^

131024 輕鬆搬家

今日的起心肝將YahooBlog搬家，一直以黎都唔搬既理由係「我睇唔明要點搞」今日睇左好耐都係睇唔明。

因為我好懶，寫既Blog真係唔多，如果真係搞唔掂既，唯有逐篇copy落新Blog度啦！另外一個問題係「搬去邊好？」對於我呢啲電腦唔叻既人黎講，諗起要搞咁多野就已經好煩。

  

後未多得Blog友「YC」 教左我一個下午，佢耐心咁逐個步驟教我，連蠢過隻豬既我都輕鬆搬家，真係唔該哂「YC」。

120910 新相機(Samsung)

呢排密密update個Blog，用個電話影相記錄，總覺得啲相唔夠好。襯住呢個機會，我比個藉口買部新相機比自己，順便學下影相！

話說兩星期前，我同一班喜愛攝影既同事講，想學影相買咩相機好？！當時大家興致勃勃咁叫我買大機Canon有咩好，Nikon有咩好，仲食飯時間專登揸車去荷李活廣場，個間Cam2睇相機。因為呢間舖放哂出黎比你任玩，唔似百記豐記咁，叫個部拎個部，拎多兩部機會黑面！

點知一拎到大機上手，我即刻知道唔岩自己，實在太重啦！我要買既係輕鬆方便，隨身攜帶去到邊影到邊就最好，影出黎既相質素高啲靚啲，但絕對唔要大傻瓜機。最後我就向Prosumer進發，Cannon‧Nikon‧Panasonic‧Pentax‧Ricoh‧Sony‧Samsung‧Casio‧Olympus‧‧‧

上網睇睇睇，出街試試試，最後我選擇左Samsung，黎緊我會用佢補返之前好多未寫既Blog，同大家分享架啦！

120825 好朋友相聚

係英國定居既好朋友B先生，返左黎香港探親，我作為B先生既好朋友，當然會見面食飯啦！因為上餐由另一位人兄埋左單，所以我再約B先生請佢食飯，幫佢洗洗塵。因為佢地話未黎過我屋企，所以今次決定黎我屋企……打邊爐。

我啲朋友都知，黎我屋企地方細細又無野玩，每次上黎活動都只係打邊爐，但點解佢地都仲咁鍾意上黎呢？因為我會一早準備好哂所有食既野，佢地一上到黎就可開餐，過門都係客我唔會要啲朋友動手，今次都有邀請朋友E小姐黎，佢仲買埋一紅一白酒上黎。

B先生帶埋佢老婆黎我家，時間過得真快，仲記得7年前有日，B先生突然打長途電話返黎，話佢要結婚返香港擺酒，要我幫佢老婆做姊妹，今日佢地已經有兩個小朋友啦！我地可能太耐無見，一路食…一路傾…一路飲，講下東…講下西…講下近況…講下上當年…講下將來……無諗過佢仲係10幾年前，我識既B先生，佢個人仲係好真好簡單……嘻嘻哈哈咁就開心左一晚。

120618 大眼仔con

兩個星期前應承左Blog友『YC』，Post 我帶開覺得幾好既大眼仔con比佢睇下，點知‧‧‧影左相咁耐都無upload上黎，連我都覺得真係過份丫！

經過我多番努力，終於upload到張相上黎啦！呢個colour con 牌子名叫 "Fresh Kon"，我平時係買開黑色同啡色，聽講出左新色灰色同埋仲有混色，但我自己就未試過啦！

啡色帶上去就比較自然，我個人覺得如果染左頭就帶啡色襯啲，對眼自然得黎又精靈。但如果諗住影相& Big Day 個日帶，我就建議大家帶黑色，因為黑色個效果就好好多，帶左上去就成個娃娃公仔眼！

120610 大出血(PS3+Pad)

嘩！今日真係大出血啦！我同關生一人買一個玩具，但好開心！關生想買PS3好耐架，係我成日唔比佢買，怕佢顧住打機唔訓覺！因為呢個玩具相信黎緊會同佢爭電視睇！

而我既新玩具就係Pad，其實我都想買好耐架啦！見人地iPad由1出到而家3都仲諗緊，係因為我真係好怕自己嫌煩，之後放低左部機唔用浪費左。但當我電話轉左用Android機之後，就完全放棄左買iPad了，因為Android實在太方便啦！

我都考慮買Asus定買Acer 好，但基於我對Acer 有偏見，同Asus外型又真係靚仔好多。再加上我細佬買左部同款Asus比媽媽學上網同玩QQ，所以最後我都係決定左買Asus！有左佢，以後做Gym唔怕悶啦！

120526 死Sell爛Sell

認真想減肥，買左團購$80。一心諗住玩完一個月先Join，但點知都要死Sell爛Sell。佢想點呀？

真係令人好討厭，明明我覺得價錢合理可以即Join，但因為唔鍾意佢死Sell爛Sell，所以決定聽日先Join玩下先！哈哈~ 唔知係咪返工時間上去，個場可以靜到咁既？

111205 恐嚇信

想嚇死人咩？打開信箱見到封恐嚇信，又係上手業主既蘇州屎屎屎屎屎。

我戰戰兢兢打比呢個華哥，開頭佢啲語氣真係好差。但當我講清楚比佢知咩事時，佢態度竟然變哂，變得好有禮貌。每個月都有大大小小銀行財務公司寄信追數。聽隔離屋講我未搬黎之前，直程有人貼埋大字係屋企鐵閘，迫不得已先搬走。希望唔好再收到呢啲恐嚇信啦~

111204 豬仔最後一程

回想起豬仔一出世真係好細隻，啲顏色又唔靚無人要佢！到我接佢返屋企，佢只係敢係廁所入面，唔敢出廳玩。到左今日又係我親自送佢走~


揀個一個好可愛既樽，放骨灰同佢最愛既出街狗帶入個樽到。

屋企仍然保留，豬仔呢個小天地。

111202 註冊日(豬仔篇)

其實結婚本來係一件開心事，但我就變成傷心事。在我註冊當天起床的時候，我的寶貝狗『豬仔』離開了我。令我呢一生一世都會記住呢一日，連當時註冊都好唔開心。雖然註冊後去左酒樓擺兩圍，聽到賤人講難聽說話都無反應，因為我只急住想返屋企處理豬仔身後事。

呢張相係豬仔走時既相片，豬仔係佢最愛既菠蘿床裏離開。好多人都信唔信人死左之後，會變飛蛾返屋企探親人。

我本人就好相信。第一次就係婆婆係舊年走個時，我訓前見到好大隻又黑又大隻既飛蛾，開頭無為意係咁趕佢，點知趕極都唔肯走，好似飛黎睇我咁！第二次就係豬仔，有隻飛蛾仔飛左返黎係天花板，睇左我地成晚。