140322元朗Dr.Fung產檢(7w)

本身發現有B時 諗左好耐睇邊個好 因為我計劃要BB時 11月頭做檢查係旺角何醫生 但上次11月尾帶阿妹去做一次產前檢查 就覺得佢唔好 好似幾搵笨咁 而且價錢貴 加上想搵近屋企啲做檢查 所以周圍問朋友同上網睇介紹 原來元朗得2間婦產科

1男1女大家都好自然咁搵女醫生 但上網睇太多負評 咁啱我弟婦係男醫生個間做開婦科檢查 所以打電話去問下價錢 個姑娘勁有耐性解釋產檢程序 姑娘實在太有心機解釋 佢一句說話令我好安心 佢話「我地會陪住你 放心啦」本身諗住打去問下先既我 竟然Book左

因為阿妹早我幾個月有BB 佢再三叮囑我唔好咁早去照超聲波 因為太早聽唔到心跳 到時會仲驚 咁我就拖到7w先睇啦 我覺得自己都好忍得 因為身邊好多朋友都5w已去照 而我就乖乖咁等到7w 我終於等到同阿B見面

去到可能Book得晏 都等左個幾鐘 好彩有媽咪陪我去 而媽咪都話第一次睇超聲波 佢都好緊張 點知一照唔係睇阿B 係睇到纖維瘤先 醫生話size都唔細 唉 點解會有纖維瘤架 明明11月頭去旺角何醫生做檢查時 乜都check哂無野喎 點解會咁架 不過馮醫生話暫時無問題 唔會影響阿B 叫我放心

而阿B都安全咁照到胎囊 而馮醫生都好好開大個喇叭 聽到阿B清楚既心跳聲 個刻開心到直程想喊出黎 我個小寶寶有心跳 健健康康咁成長緊 我好感恩 上天送我一個健康既小寶寶 

140318約屯門醫院照唐氏(6w3d)

因為一直都抽唔到時間 今日專登請半日假 媽咪陪我去去屯門醫院E1房 排期做唐氏檢查 佢小冊子上寫 唐氏檢查必須係11w至13w內檢查為準 而醫院比左4月25號個期我 個時我係11w6做的 所以係正常時間

而小冊子更講如果錯過首次檢查 就要係16w內既抽胎水及抽絨毛 聽講對胎兒會危險啲 而且係痛架 所以健康院姑娘個日叫我一定要早啲過醫院排期就係咁解 

140317開始食Materna+DHA(6w2d)

又係聽講孕婦要補充身體有營養 先可以比阿B吸收到養份 傳聞惠氏有2隻係必食補充品 就係惠氏出既Materna同DHA 前者話有多重維他命 所有孕婦需要既物質 而後者就加強BB腦部發展 唔食唔得咁 正所謂贏在起跑線上 我當然唔執輸都買左黎食啦 

140316換護膚品(6w1d)

聽啲媽咪講 孕婦就唔好亂用護膚品 其實我本身個人好懶 都唔會勤力搽野 但基本lotion都會搽下 傳聞中孕婦最安全 佢自稱無添加就係用Fancl 而我都係跟大隊轉用佢 

140314阿基結婚+爸B蒸魚(5w6d)

今日係舊同事阿基結婚 之前應承左去 但啲老人家話唔夠3個月唔好去飲 相沖喎 咁就放左人飛機啦 留係屋企煮飯食 關生話要食得有營養 所以蒸魚湯比我地食 似乎有阿B都幾有福利 為左健康我食左大半條魚 正丫 勁飽囉 

140313約元朗容鳳書產檢(5w5d)

經過尋日同關生既商討 決定左去屯門醫院生之後 今日就抽時間去左容鳳書健康院排產檢 點知佢比左一疊表格 叫我返屋企填 下次黎產檢時要交 睇睇日期排到5月7號 先有得睇第1次

之後又比左張去驗唐氏既排期紙 要親身去屯門醫院排期 姐姐叫我早啲過去排 遲左趕唔切做 但要4點半前到 即係趕唔切啦 唯有等下次啦 

140312驗孕+寫醫生紙(5w4d)

今日訓醒喉嚨好痛 加上尋日某高級同事玩野 叫我同佢一齊去北角買二手傢俬 諗諗下就唔想返工 老實講而家既我 真係唔適合咁周圍去 佢開到口話叫我去係幫手推傢俬 我都唔明點解咁多男同事唔叫 係都要我去 我真係得閒成咁咩 加上已經病左2日 睇埋醫生拎假紙唔返工 順便驗埋孕拎醫生紙去健康院登記

近近地落左樓下睇 一去到比左個樽仔我留尿 之後姑娘拎左入去 隔一陣醫生叫名入房好搞笑 第一句恭喜我 之後就拎左一疊奶粉公司既表格比我 佢就問我想私家定政府生 佢要我填哂啲奶粉入會表格 之後先寫張証明比我 唔通醫生都有Quota既

拎住張醫生証明 返到屋企諗究竟去邊間政府醫院生好 好似我本身住北區 理應係威爾斯醫院生既 但我份工個新office係元朗 黎緊會返去阿媽度住多 咁又好似屯門醫院方便啲 但又聽啲朋友講 婦產科最好係QE 諗到人都癲呀 最後我等關生決定 佢講左句最緊要方便 咁就揀左方便自己又方便阿媽既屯門醫院啦 

140311睇院長(5w3d)

我呢個媽媽真係好無用 終於病倒了 因為一早約左家姐去睇中醫 所以病病地都出去 聽啲朋友講有BB唔可以食西藥 所以自己順便睇埋 今次有左BB除左睇感冒 仲睇埋安胎

之前為準備生BB調理身體 所以睇過幾次何院長 因為戒口戒得唔清 去親都比佢鬧爆 今次入去都戰戰兢兢 何院長真係好有料 一把脈就知道我有左 之後教我好多野 唔可以著拖鞋 唔可以食乜 唔可以比人搭膊頭 唔可以比人撞 實在太多禁忌啦 不過寧可信其有 不可信其無 我都會乖乖記住

行出房時 佢啲徒弟仲幫我開路 叫啲人唔好撞到我 大肚婆果然有優惠 執左藥就同家姐食飯 好慘乜都唔食得 好似要戒口戒得好清咁 真係淒涼 

140305爸B蒸魚+煲湯(4w4d)

關生知道孕婦最好食魚 所以今日專登煮魚比我食 仲煲左蕃茄薯仔魚湯比我飲 阿B雖然我地未知你係仔仔定女女 但媽咪已知道爸B好錫你 阿B要同媽咪一齊努力丫 

140304真係Bingo左？(4w3d)

同尋日朝一樣 一訓醒覺第一件事就係驗孕 驗屈牌驗孕棒 心情無咁緊張 但搞到自己擔心左 原因係傳聞中最敏感好用既屈牌驗孕棒 等左30分鐘都無反應呀 因為趕住返工 最後我都係出左門口

但因為等左30分鐘都無反應 全日都好唔安落 全日都心不在焉 都唔知自己發生咩事 不停去廁所呢埋問自己 點解支驗孕棒會無反應 係咪有咩問題呢 係咪我尋晚訓得太衰整到BB呢 上網成日睇人講唔夠3個月 好易同BB講拜拜 會唔會我係宮外孕呢 究竟我係咪真係有BB呢

好唔容易先等到收工 個人真係諗到就黎痴線 搭車返屋企時 諗左好多好多負面既野 個人勁擔心 仲諗去唔去睇急症睇好呢 返到屋企感動到喊左出黎 我見到今朝等左半個鐘都無反應既屈牌驗孕棒 顯示左一條紅線 我啲眼淚完全失控 直到關生返黎嚇呆左佢 知道左發生咩事後 就唔比我再check 咁唯有忍下啦 

140303確定真係Bingo左(4w2d)

尋晚成晚都好似無訓咁 一訓醒覺第一件事就係驗孕 驗3支野(紅D+綠D+萬寧牌) 心情好好好緊張呀

關生同我都好緊張 眼都唔斬咁望住啲驗孕棒 過左3分鐘萬寧牌有好淺好淺色既線 紅D都好紅 而綠D就到5分鐘先有顏色 確定左真係Bingo左 就換衫返工啦 落到屋企樓下 忍唔住打比媽咪報喜 媽咪真係好高興 因為阿妹早我幾個月有左 佢提我到6-7weeks先去診所驗孕 因為太早去都無用 check唔到心跳之餘 到時搞到自己仲擔心

因為返新工既關係 呢段時間係返總公司 暫時未有安排野比我做 所以都係幫手執頭執尾 同睇下啲文件 我今日就上勞工處網頁 Print啲僱傭條例黎睇下啦 不過唔洗計都知 我一定唔會有產假囉 不過唔緊要 上天送我一個健康寶寶係無價 所以假期對我係唔重要既

收工返到家 又忍唔住再驗 睇到結果就安心 之前聽過啲朋友講 咁多隻驗孕棒中 最敏感最準確係屈臣氏 雖然我唔明點解咁講 但我收工都忍唔住買左支返屋企 等聽朝再試 我諗試多2支無壞既 

140302發現Bingo(4w1d)

今日同朋友食完飯返到屋企 都一貫慣例咁check下綠D 話哂今日係第29日 如果唔中 就準備聽日會黎M 點知check完 見到綠D乜野都無 心諗都預左架啦 行出廳同關生講可以食雪糕 下個cycle再努力過 關生第3次聽到都開始無乜失望咁 我就拎左盒大Dreyers出黎 好放肆咁嘆左半盒啦

食完雪糕就入廁所沖涼啦 沖完涼著好衫準備訓覺 點知多手拎多次條綠D睇 點解好似有條勁淺色既哄既 咁係唔係中左獎呢 個刻緊張到不得了 好大聲叫關生入黎 關生對眼鬥哂雞咁望條綠D 之後話不如驗多次

平時我會一次過check埋紅D綠D 但點解我頭先無check埋既呢 我個人越急就越無小便 之後狂飲水之下 終於有小便啦 基於頭先都等左一陣先出個哄既關係 我同關生決定等5分鐘後再望 等待呢5分鐘真係好漫長 好唔容易等到一睇 今次綠D深色左咁 而紅D明顯深色 就正如Blog友分享咁 無可能係Day29排卵架

呢刻心情真係好難形容 既好開心又複雜 關生開心到好感動 而我都忍唔到流眼淚 估唔到係我地放棄造人呢個月會成功 我倆公婆囉囉孿成晚 完全興奮到訓唔著 好期待聽朝起身check下篤晨尿 因為我之前買左支萬寧牌 訓醒就可以再驗真啲