140425屯門醫院照唐氏(11w6d)

好唔容易先等到今日 可能入左啲媽咪會 成日聽埋好多小產既消息 個人負面哂 聽講照唐氏係第一個大關口 加上我個人真係緊張大師 因為照唐氏我驚左2晚訓唔到 好擔心好擔心 可能覺得自己唔細啦 風險都大啲 所以我今日叫左關生同我一齊黎 因為有機會係第一次見阿B 亦同時有機會係最後一次

今日一早就到左屯院E1房 登記左之後 醫院姑娘安排左我地入房聽講座 其實係播錄影帶 之後派問卷 再安排入房照超聲波 我地係最後所以真係好緊張 而我都睇得出關生都好緊張

大約等左20分鐘左右 到叫我名入房照超聲波 無見阿B一個月 明顯有成長 有手仔腳仔啦 不過係短手短腳仔 真係好可愛呀 關生望住個mon傻笑 而我好緊張度頸皮結果 出黎結果好好 1.2mm 我同關生真係好開心 照完仲要再去抽血 太開心啦 怕抽血既我竟然都唔覺得太痛